I tison Kaisaréa, man Lôk Rôma wada a bé ñane ntôñ mbôgôl bisônda, jôl jé li bé le Kornéliô. Lôk Yuda i bé ti nye lipém, to hala kiki a bé bé man Lôk Yuda. A bé hôla diyeyeba ni ngoo bôt. A bé hémle Yéhôva, a soohege ki nye hiki kel. Kel yada, añgel i pémél Kornéliô, i kal nye le: ‘Djob a ñemble masoohe moñ. I ngéda ini, Pétrô a yé i tison Yôpé, ep bôt i sébél nye.’ Kunda yada, Kornéliô a ep bôt baa i Yôpé, yom kiki bo 48 ma kilôméta, i nwelmbok.

Nlélém ngéda, i Yôpé, Pétrô a kôs yiinda yada. A tehe binuga Lôk Yuda i bééna bé kunde i je, ndi a nok kiñ i nkal nye le a je gwo. Pétrô a tjél, a kal le: ‘Me mah je bé me nuga i i yé nyega i niñ yem.’ Kiñ i kal nye le: ‘U sébél bañ binuga bini le gwom bi nyega. Inyule Djob a mpubus gwo.’ Mbuu mpubi u kal Pétrô le: ‘Bôt baa ba yé nwemel woñ. Kee ni bo.’ Pétrô a ke i nwemel, a bat bo inyuki ba yé ha. Ba timbhe nye le: ‘Kornéliô, man Lôk Rôma, ñane ntôñ mbôgôl bisônda, nyen a ñom bés. U nlama lo i mbai yé, i Kaisaréa.’ Pétrô a naña bo i tégbaha i u u ni nye kiki  bakén bé. Kel i bé noñ ha, Pétrô ni lôk kéé ipe i Yôpé, ba ke ni i bôt ba i Kaisaréa.

Kornéliô a tehe bañ Pétrô, a ôm maboñ isi. Ndi Pétrô a kal nye le: ‘Telep! Yak me, me yé mut kiki we. Djob a nkal me le me lo i ndap yoñ, to hala kiki Lôk Yuda i njôp bé mandap ma bôt ba matén mape. Hanano, soho kal ni me inyuki u nséble me.’

Kornéliô a añle Pétrô le: ‘Hala a yé dilo dina len, me bé soohe Djob, ndi añgel yada i kal me le me om bôt i sébél we. Soho niiga bés bibañga bi Yéhôva.’ Pétrô a kal le: ‘Me ntehe le Djob a mboñ bé mbagla. A nleege tonjee a gwé ngôñ i bégés nye.’ Pétrô a toñle bo ngandak mam inyu Yésu. Mbus ha, mbuu mpubi u kwél Kornéliô ni i bôt ba bé ha ni nye, ni bobasôna ba kôs sôble.