Di Kaesarea, adong tentara ni halak Rom na margoar si Kornelius. Nang pe ndang halak Jahudi ibana, alai hormat do halak Jahudi tu ibana. Burju do ibana tu na pogos. Porsea do si Kornelius tu Jahowa jala jotjot do ibana martangiang. Sada tingki, mangkatai ma sada suru-suruan manang malaikat tu si Kornelius. Ninna ma, ‘Nunga dibege Debata tangiangmu. Suru ma halak tu kota Joppe manjumpangi si Petrus asa ro ibana mandapothon ho.’ Disuru si Kornelius ma tolu baoa tu kota Joppe, hira-hira 50 kilometer ma daona.

Tingki i, di Joppe do si Petrus. Mandapot penglihatan ma ibana. Diida ibana ma angka binatang na haram manang na so boi alangon. Adong ma soara mandok boi do diallang si Petrus angka binatang i. Alai ndang olo si Petrus. Didok ma, ‘Ndang hea huallang binatang na haram.’ Didok soara i ma, ‘Unang be dok haram angka binatang i. Didok Debata, nunga boi i allangon.’ Dung i didok ma, ‘Adong tolu baoa di pintu ni jabum. Dapothon ma nasida.’ Didapothon si Petrus ma nasida jala disungkun laho marhua. Didok angka baoa i ma, ‘Si Kornelius do manuru hami, sahalak tentara ni Rom do ibana. Disuru do asa ro ho tu jabuna di Kaesarea.’ Ditogihon si Petrus ma nasida tu jabuna jala  modom ma nasida disi. Marsogotna i, laho ma si Petrus dohot piga-piga murid ni Jesus sian Joppe tu Kaesarea.

Dung pajumpang si Kornelius dohot si Petrus, marsomba ma si Kornelius. Alai didok si Petrus ma, ‘Unang somba ahu! Sarupa jolma do hita. Debata do na marsuru ahu ro tu jabumon, nang pe ndang boi halak Jahudi tu jabu ni halak na so Jahudi. Saonari, paboa ma boasa disuru ho ahu ro.’

Didok si Kornelius ma, ‘Opat ari naung salpu, martangiang ahu tu Debata. Adong suru-suruan na mandok asa husuru halak mandapothon ho. Paboa ma tu hami hata ni Jahowa.’ Didok si Petrus ma, ‘Saonari huboto ma, adil do Debata. Lomo do rohana asa sude jolma manomba Ibana.’ Godang ma diajarhon si Petrus tu nasida taringot Jesus. Gabe mandapot tondi parbadia ma nasida sude. Dung i, tardidi ma nasida.