Rɔmunfuɛ mun be sonja su kpɛn kun tran Sezare. Be flɛ i Kɔɔnɛyi. Ɔ timan Zuifu, sanngɛ Zuifu mun be ɲin yi i kpa. Ɔ uka yalɛfuɛ mun, nin be nga be leman wie’n. Kɔɔnɛyi lafi Zoova su, yɛ ɔ srɛ i cɛn kwlakwla. Cɛn kun’n, anzi kun yili i wun nglo kleli Kɔɔnɛyi, kpɛkun ɔ seli i kɛ: ‘Ɲanmiɛn tili ɔ srɛlɛ’n. Sunman sran Piɛli sin Zope lɔ, naan be ko se i kɛ ɔ bla ɔ awlo wa.’ Be ja nun lɛ’n, Kɔɔnɛyi sunmannin sran nsan Zope lɔ. Klɔ sɔ’n nin Sezare be afiɛn’n ti nun kilo kɔe ablenun (50).

Blɛ kunngba sɔ’n nun’n, Piɛli wunnin like kun aolia nun Zope lɔ. Ɔ wunnin nnɛn wie mun. Zuifu mun be leman atin be diman nnɛn sɔ mun. Sanngɛ ɔ tili sran kun nɛn. Sran sɔ’n seli i kɛ ɔ di nnɛn sɔ mun. Piɛli w’a kplinman su. Ɔ seli kɛ: ‘N nin-a diman nnɛn nga mmla’n waan ɔ ti fiɛn’n i wie le.’ Yɛ sran’n seli i kɛ: ‘Nán se kɛ nnɛn nga mun be ti fiɛn. Ɲanmiɛn w’a yo be sanwun.’ Sran’n seli Piɛli ekun kɛ: ‘Sran nsan be o ɔ anuan’n i sin lɛ. A nin be wɔ.’ Piɛli toli be lɔ, kpɛkun ɔ usali be sa nga ti yɛ be bali’n. Be tɛli i su kɛ: ‘Rɔmunfuɛ mun be sonja su kpɛn nga be flɛ i Kɔɔnɛyi’n, yɛ ɔ sunmannin e-ɔ. I waan a bla Sezare, i awlo lɔ.’ Piɛli  seli sran sɔ mun be kɛ be la naan sɛ lika cɛn’n b’a wɔ. Kɛ lika cɛnnin’n, Piɛli nin be ɔli Sezare. Kɛ bé kɔ́’n, be nin Zope lɔ aniaan wie mun yɛ be ɔli-ɔ.

Kɛ Kɔɔnɛyi wunnin Piɛli’n, ɔ kotoli i bo. Sanngɛ Piɛli seli i kɛ: ‘Jaso! N ti klɔ sran kɛ wɔ sa. Zuifu mun be kɔman be nga be timan Zuifu’n be awlo. Sanngɛ Ɲanmiɛn seli min kɛ n bla wɔ awlo wa. Siɛn’n, kan ndɛ nga ti yɛ a sunmannin sran min sin’n.’

Kɔɔnɛyi seli Piɛli kɛ: ‘I cɛn ba nnan yɛ, kɛ ń srɛ́ Ɲanmiɛn’n, anzi kun seli min kɛ n sunman sran ɔ sin. Yaci, kle e Zoova i ndɛ’n.’ Piɛli seli kɛ: ‘M’an wun i wlɛ kɛ Ɲanmiɛn kpaman sran nun. Sran kwlaa ng’ɔ kunndɛ kɛ ɔ́ sú i’n, ɔ sɔ i nun klanman.’ Piɛli kleli be Zezi i su like kpanngban. I sin’n, Ɲanmiɛn wawɛ’n jrali Kɔɔnɛyi nin be nga be o lɛ’n be su. Kpɛkun be yoli be kwlaa be batɛmun.