I Kesarea, lit komandan militer si gelarna Kornelius. Amin pe ia labo kalak Jahudi, tapi kalak Jahudi mehamat man ia. Meriah ukurna nampati kalak si mesera kegeluhenna ras si merluken penampat. Kornelius pe tek man Jahwe, janah rusur ia ertoto man bana. Bas sada wari, lit malekat si reh ndahi Kornelius, janah nina malekat e, ‘Nggo ibegiken Dibata totondu. Gundari, suruhlah kalak ngelegi Petrus i kuta Jope.’ Mis isuruh Kornelius telu kalak anak buahna ngelegisa ku Jope, si dauhna 50 kilometer ku selatan.

Sanga si e, Petrus lit i Jope. I je, icidahken Jahwe man bana binatang-binatang si la banci ipan kalak Jahudi, janah lit sora si nuruh ia gelah man daging e. Tapi Petrus la nggit, janah nina, ‘La pernah kupan binatang najis si bage segedang geluhku.’ Tapi nina sora e, ‘Ulanai katakenndu e najis, perban nggo iban Dibata ia bersih.’ Nce, nina sora e ka, ‘Lit telu kalak si nimai i lebe-lebe pintundu. To, ikutkenlah kalak e.’ Italangi Petrus me pintu rumahna, janah isungkunna kai tujun kalak e reh. Nina kalak e, ‘Kami isuruh Kornelius, komandan militer Roma. Arus kam ku rumahna i Kesarea.’ Bas berngi e, iundang Petrus kalak e erberngi i bas rumahna. Kenca nggo terang, berangkat me Petrus ku Kesarea radu ras turang senina si lit i Jope.

Sanga Kornelius jumpa ras Petrus, nungkuk ia nembah Petrus. Tapi nina Petrus, ‘Cinderken! Aku pe manusia nge, seri ras kam. Isuruh Dibata aku reh ku rumahndu amin pe labo biasana kalak Jahudi reh ku rumah si labo kalak Jahudi. Jadi, kai nge tujunndu nuruh aku reh?’

Iceritaken Kornelius me, ‘Empat wari si lewat, reh malekat ndahi aku, janah isuruhna aku ngelebuh kam. Sampatindu min kami mpelajari kata Jahwe.’ Nina Petrus, ‘Kuteh nge maka Dibata adil kap. Ise pe si nggit nembah Ia, pasti ialokenNa.’ Kenca si e, melala kel siajarken Petrus kerna Jesus. Kesah si Badia pe nusur man Kornelius, bage pe man kalak si ras ia i je, janah kerina kalak e ibaptis.’