Évete nsamba bezimbi éziñ é mbe e Césarée, é to jôé na Corneille. Akusa bo na a nji be mone Bejuif, Bejuif be mbe be sémé’é nye. A mbe a mvama’ane minzôzoé. A mbe fe a buni’i Yéhôva, a ye’elane fe nye éyoñ ése. Môs éziñ, ange a nga kui be Corneille, a jô nye na: ‘Zambe a wô’ôya meye’elane môé. Éyoñe ji, lôme’e bôt e tisone ya Joppée, vôme Pierre a to, asu na a zu be wo.’ Été été, Corneille a nga lôme bôte belal e Joppée; tison éte é mbe kilimeta 30 a tisone jé.

Awolo te ebien, e Joppée, Pierre a nga bi ñyenan. A nga yene betit Bejuif be nji be be yiane di, a wô’ô fe tyiñ é jô’ô nye na a di be. Pierre ve ben, a jô’ô na: ‘Te ke na me diya tit é ne mvit môs éziñ.’ Ane tyiñ éte é nga jô nye na: ‘Te jô na betite bete be ne mvit. Amu Zambe émien a fubuya be. Bôte belal be tele wo mbé. Kele be yen.’ Ane Pierre a nga ke be yen, a sili be amu jé be mbe valé. Be nga jô nye na: ‘Corneille, évete bezimbi, a te lôme bia be wo. Wo yiane ke nda jé e Césarée.’  Ane Pierre a nga nyiñili be nda jé na be bômbô valé alu ete. Môs ô nga tôé valé, a nga ke e Césarée a bobenyañe bé ya Joppée.

Éyoñe Corneille a nga yene Pierre, a nga kute meboñe si. Ve Pierre a nga jô nye na: ‘Kolô’ô si! Ma fe me ne môt ane wo. Zambe a nga jô ma na me zu nda jôé, akusa bo na Bejuif ba ke ki menda Begentil. Kate ñhe ma amu jé wo te bañete ma.’

Ane Corneille a nga jô Pierre na: ‘Den a nto melu menyin, me nga ye’elane Zambe, ane a nga lôme ange; nde ange ate a nga jô ma na me bañete wo. Éngôngo, ye’ele ma mejô me Yéhôva.’ Pierre na: ‘Éyoñe ji nje ñhe me yemeya na Zambe a nji bo ôbangam. A nye’e môt ase a kômbô kañe nye.’ Ane Pierre a nga ye’ele be abui mam a lat Yésus. Ane Corneille a nda bôte jé be nga nyoñe mbamba nsisim, a baptisôban.