O Sesareya wahikala mulobwana w’ettomo wa mukadda Roma wakuweliwa Kornélio. Masiki vahaliye mukadda Judá, Ayuda annimuriha. N’oderetu waye iyene wannakamihedha ayelegi. Kornélio wela omuroromela Yehova vina wela omukosela malobelo. Omattiyu dhahi mungelo wa Yehova wahimuttanyuwela bamwaddela: ‘Mulugu ohiwa malobelo enyu. Ovano mwarume attu adhowe anfwanye Pedro oli o Jope, amulobe adhe.’ Momaguva-mwene Kornélio oharuma alobwana araru wi adhowe o Jope, wego wolapela wali makilometuru 30.

Wenewo o Jope, Pedro wahikaana dhoroha. Iyene ohona dhinama dhaloga Ayuda wila sokwaruliha dhaharumeliwa oja, nanda ohiwa lizu naloga wila aje. Pedro okoodda, ohakula dhahi: ‘Eh, miyo kaddinajaga dhilobo dhonyakuwa ninga esene.’ Lizuna nihidhowanavi: ‘Onasabele ologa wila s’onyakuwa. Eso Mulugu ohimala okoddeliha.’ Pedro vina ohaddeliwa dhahi: ‘Otakulu oko ohikala alobwana araru. Dhowá na awene.’ Pedro ohifiya vamusuwo ohawona alobwanaya nanda ohavuza yadhelani. Awene amwakula: ‘Ofiya wehu okuno onirumile ddi  Kornélio, munddimuwa wa anyakoddo a Roma. Onfuna wila nyuwo mudhowe owani-waye o Sesareya.’ Pedro ohawoba alobwanaya wi akale na iyene omattiyu muzima. Mmangwananimwa, iyene ohidhowa na awene o Sesareya, ohattukula abali eena a o Jope.

Kornélio mmooneliye Pedro, omukokorela. Pedro omwaddela dhahi: ‘Kavenyani! Miyo ddili muttu ninga nyuwo. Oddirumile ofiya okuno ddi Mulugu, masiki aziwagavi wila Ayuda kanvahana na Amalabo. Ovano ddaddeleni eddikuwelelinyu?’

Kornélio omwaddela Pedro eraga: ‘Malabo manai mundduni ddela olobela wa Mulugu, mungelo oddaddela wi ddukuwelihe. Eh, mbwana kanisunzihe mazu a Yehova.’ Pedro omwakula: ‘Ovano ddinoziwa wila Mulugu kanimuttiyaniha muttu. Iyene onomwakela muttu-muttu onfuna omulaba.’ Pedro ohiroma wasunziha dhilobo dhinjene mwaha wa Yezu. Nomala muya wokoddela ohimmorela Kornélio na attu otene afwanyeya vani-vaye, nanda otene ahibatiziwa.