Mu Sezarea, mwapwile umwe kapitau Ka-Roma yoze te avuluka ngwo Koneliu. Chipwe ngwe te hi Ka-Yunda ko, nihindu A-Yunda te kakumusa vumbi. Iye te kakukwasa yiswale ni waze te akufupa ukwaso. Koneliu te kakufuliela muli Yehova nawa te kakulemba kuli iye matangwa eswe. Limwe tangwa, umwe mungelo yasoloka kuli Koneliu ni kumwamba ngwenyi: ‘Zambi kakupanjika yilemba ye. Haliapwila tuma malunga mu mbonge ya Yopa, muze ali Petulu, hanga amulweze eze kuli yena.’ Hazehene, Koneliu yatuma malunga atatu ku Yopa mbonge yize te yatwama ha usuhwe wa tando 30 kuto.

Ha shimbu lizeliene, Petulu mu Yopa neye yatambula usolwelo. Yamona tushitu waze A-Yunda te keshi kulia, nawa yevwa liji linamulweze hanga alie. Petulu yalituna, hakwamba ngwenyi: ‘Ami kanda nguchilia kama tushitu aluchisa ku mwono wami.’ Liji liacho yilimulweza ngwo: ‘Kanda uvuluka tushitu wano ngwo aluchisa. Zambi hanaawahisa.’ Petulu yamulweza nawa ngwo: ‘Ku chikolo che kuli malunga atatu. Yako hamwe no.’ Petulu yaya ku chikolo nawa yahula malunga jacho mumu liaka te ali ku chikolo. Ayo yakumbulula  ngwo: ‘Katutuma kuli Koneliu, kapitau wa tujita twa A-Roma. Hanga uye ku zuwo lienyi ku Sezarea.’ Petulu yeta kuli malunga jacho hanga apombe ku zuwo lienyi. Mukwachako, yijiya ku Sezarea, hamwe ni amwe mandumbu aku Yopa.

Muze Koneliu amwene Petulu, yatwa makungunwa hashi. Alioze Petulu yamwamba ngwenyi: ‘Katuka! Ami nguli mutu ngwe yena. Zambi kangulweza hanga ngwize ku zuwo lie, chipwe ngwe A-Yunda keshi kuya ku mazuwo ja akwa-mavungu. Haliapwila ngulweze, mumu liaka wangusanyika.’

Koneliu yalweza Petulu ngwenyi: ‘Ha matangwa awana kunyima nalembanga kuli Zambi, chocho umwe mungelo yangulweza hanga ngukusanyike. Lisesa tulongese kama maliji a Yehova.’ Petulu yamba ngwenyi: ‘Mba hinanyingika ngwami Zambi keshi katonde. Iye kakutayiza mutu mweswawo mamufuliela.’ Petulu yaalongesa yuma yinji hakutwala kuli Yesu. Chocho spiritu yisandu yiyiza hali Koneliu ni waze apwile no hamuwika nawa eswe yaapapachisa.