Ɔrɔmukaw ka sɔrɔdasiw kuntigiba dɔ tun be Sezare dugu la, a tɔgɔ ko Kɔrinɛyi. Yahutuw tun b’a bonya hali k’a sɔrɔ a tɛ Yahutu ye. A tun b’a tɛgɛ labila ka fantanw ni dɛsɛbagatɔw dɛmɛ. Kɔrinɛyi tun lanin be Jehova la ani a tun b’a deli tuma bɛɛ. Loon dɔ, mɛlɛkɛ dɔ y’a yɛrɛ yira Kɔrinɛyi la k’a fɔ a ye ko: ‘Ala ye i ka deliliw lamɛn. Sisan, mɔgɔw ci Zope dugu la ka taga Piyɛri weele ko a ka na.’ O yɔrɔnin bɛɛ, Kɔrinɛyi ye cɛɛ saba ci Zope, Sezare worodugu fan fɛ. Kilomɛtɛrɛ 50 ɲɔgɔn lo tun be Sezare ni Zope cɛ.

O tuma na, ka Piyɛri to Zope, a ye yelifɛn dɔ ye. A ye kongosogow ye, Yahutuw tun man kan ka minw dumu. O kɔ, a ye kumakan dɔ mɛn min ko a ka wuli k’u dɔ faga k’a ɲimi. Piyɛri banna ani a ko: ‘Abada, ne ma deli ka fɛɛn nɔgɔnin dumu ka ye.’ O kumakan y’a fɔ a ye ko: ‘Kan’a fɔ k’o kongosogow ye fɛɛn nɔgɔninw ye. Ala y’u saniya.’ A y’a fɔ Piyɛri ye fana ko: ‘Cɛɛ saba b’i ka daa la. Wuli ka tugu u kɔ.’ Piyɛri tagara daa la ani a y’o cɛɛw ɲininga u nakun la. U y’a jaabi ko: ‘Ɔrɔmu sɔrɔdasiw kuntigi Kɔrinɛyi lo y’an ci. A ko i ka na ale ka soo Sezare.’ Piyɛri y’a ɲini u fɛ  ko u ka si. O dugusagwɛ, a tugura u kɔ ka taga Sezare. Balima minw tun be Zope olu dɔw tagara n’a ye.

Kɔrinɛyi ye Piyɛri ye tuma min na, a y’a kunbiri gwan a ɲɛɛ kɔrɔ. Nka Piyɛri y’a fɔ a ye ko: ‘Wuli! Ne fana ye adamaden ye komi ele. Ala lo ko n’ ka na i ka soo hali k’a sɔrɔ Yahutuw man kan ka taga siya wɛrɛ mɔgɔw ka soo. Sisan, hakɛ to k’a fɔ n’ ye fɛɛn min kama i ye n’ weele.’

Kɔrinɛyi y’a fɔ Piyɛri ye ko: ‘A tile naani ye nin ye, ne tun be Ala delila ani mɛlɛkɛ dɔ y’a fɔ n’ ye ko n’ ka mɔgɔw ci ka taga i weele. Sabari, an kalan Jehova ka kumaw na.’ Piyɛri y’a fɔ ko: ‘Ne y’a lɔn sisan ko Ala tɛ mɔgɔ bɔ mɔgɔ la. Mɔgɔ o mɔgɔ min b’a fɛ k’a bato, o tigi koo be diya a ye.’ Piyɛri y’u kalan fɛɛn caaman na Yezu koo la. O kɔ, Kɔrinɛyi ni minw bɛɛ tun be yen, hakili senu jigira u kan ani u bɛɛ batizera.