Akwa owoekọn̄ Rome kiet emi ekekere Cornelius okodụn̄ ke Caesarea. Mme Jew ẹma ẹsikpono enye etieti kpa ye oro enye mîkedịghe Jew. Enye ama esin̄wam mme ubuene ye mbon emi ẹyomde un̄wam. Cornelius ama ọdiọn̄ọ Jehovah, onyụn̄ esibọn̄ akam ọnọ Jehovah kpukpru ini. Usen kiet, angel ama edidọhọ enye ete: ‘Cornelius, Abasi okop akam fo. Dọn̄ mme owo ẹka Joppa ẹkedọhọ Peter edi ufọk fo.’ Enye ama ọsọsọp ọdọn̄ mme owo ẹka Joppa; to ke Caesarea sịm Joppa edi n̄kpọ nte itiat 30.

Kpa ke ukem ini oro, Peter ama etie ke Joppa okụt n̄kukụt n̄ko. Enye ama okụt nsio nsio unam emi ibet akpande mme Jew ndita, onyụn̄ okop uyo ọdọhọde enye ete osio ata. Peter ama esịn onyụn̄ ọdọhọ ete: ‘Tọn̄ọ n̄kamamana, ntaha unam emi edehede.’ Uyo oro ama ọdọhọ enye ete: ‘Kûkot mmọ ndedehe unam. Abasi anam mmọ ẹsana.’ Ẹma ẹnyụn̄ ẹdọhọ Peter ẹte: ‘Owo ita ke ẹyom fi. Tiene mmọ.’ Peter ama ọwọrọ okobụp mmọ m̀mê nso inam mmọ ẹyom imọ. Mmọ ẹma ẹdọhọ enye ẹte: ‘Akwa owoekọn̄ Rome emi ekerede Cornelius ọdọn̄ nnyịn idi. Enye ọdọhọ edi ufọk imọ ke  Caesarea.’ Peter ama ọdọhọ mmọ ẹdu ye imọ tutu edem usen. Edem usen oro, enye ama asan̄a ye mmọ ye ndusụk nditọete ke Joppa aka Caesarea.

Ke ini Peter odụkde ufọk Cornelius, Cornelius ama ọtọn̄ọ ẹdọn̄ ke isọn̄. Peter ama ọdọhọ enye ete: ‘Daha da! Ami ndi owo nte afo. Abasi ọkọdọhọ mi ndi ufọk fo kpa ye oro mme Jew mîsidụkke ufọk mme Gentile. Mbọk tịn̄ ntak emi ọkọdọn̄de ẹdikot mi.’

Cornelius ama ọdọhọ Peter ete: ‘Ini n̄kosụk mbọn̄de akam nnọ Abasi usen inan̄ emi osụk ebede ke angel ọkọdọhọ ndọn̄ ẹdikot fi. Mbọk kpep nnyịn se Jehovah ọdọhọde ekpep nnyịn.’ Peter ama ọdọhọ ete: ‘Mmokụt ke Abasi inamke asari. Enye enyịme owo ekededi anam n̄kpọ esie.’ Peter ama ekpep mmọ ediwak n̄kpọ aban̄a Jesus. Abasi ama ọnọ Cornelius ye mbon emi ẹkedude ye enye edisana spirit, ẹma ẹnyụn̄ ẹnịm kpukpru mmọ baptism.