E tiko e Sisaria e dua na turaganivalu rogo na yacana o Konilio. E sega ni Jiu ia era dokai koya na Jiu. E dau lomasavu ni vukei ira na dravudravua kei na vakaloloma. E vakabauti Jiova o Konilio, e dau masu tale ga vua. Dua na siga e rairai vua na agilosi, e kaya: ‘Sa rogoca na Kalou nomu masu. Mo tala eso ina koro o Jopa ni tiko kina o Pita, kerei koya me lako mai vei iko.’ E qai tala o Konilio e tolu na tagane i Jopa, e rauta ni 30 na maile ina ceva.

E qai raivotu o Pita e Jopa. E raica na manumanu era sega ni dau kania na Jiu, e rogoca tale ga ni tukuni me kania. E bese o Pita, e kaya: ‘Au se bera vakadua ni kania na manumanu dukadukali.’ E qai tukuni vua: “Kua ni tukuna ni dukadukali na ka sa vakasavasavataka na Kalou.” E tukuni vei Pita: ‘Ratou wawa tiko e katuba e tolu na tagane. Lako vata kei ratou.’ E lako i katuba o Pita me taroga se cava eratou vinakata. Ratou kaya: ‘E talai keitou mai na turaganivalu ni Roma o Konilio. Moni lako ina nona vale e Sisaria.’ E mani sureti ratou i vale me  ratou nona vulagi. Ena siga tarava, e tomani ratou o Pita i Sisaria kei na vica tale na mataveitacini mai Jopa.

Ni sotavi Pita o Konilio, e tekiduru sara. Ia e kaya vua o Pita: ‘Tucake! Au tamata tale ga o yau. Era sega ni dau curu na Jiu ina nodra vale na kai veimatanitu, ia e tukuna vei au na Kalou meu lako mai ina nomuni vale. Yalovinaka tukuna mai se cava oni vinakata.’

E kaya vua o Konilio: ‘Au masu tiko vua na Kalou me va na siga, e qai tukuna vei au na agilosi meu tala noqu tamata mo gole mai. Yalovinaka mo vakavulici keimami ena vosa i Jiova.’ E kaya o Pita: ‘Au sa qai kila qo ni sega ni dau veivakaduiduitaki na Kalou. E vakadonui ira era vinakata mera qaravi koya.’ E vakavulici ira o Pita ena levu sara na ka me baleti Jisu. E sobuti Konilio na yalo tabu kei ira na tiko vata, oti era papitaiso kece.