Bhí oifigeach airm Rómhánach, darbh ainm Coirnéilias, ina chónaí i gCéasaráia. Cé nár Ghiúdach a bhí ann, bhí an-mheas ag na Giúdaigh air. Chabhraigh sé go flaithiúil leis na boicht. Chreid Coirnéilias in Iehova agus bhíodh sé ag guí de shíor chuige. Lá amháin tháinig aingeal go dtí Coirnéilias agus dúirt sé: ‘Tá do phaidreacha cloiste ag Dia. Anois, cuir fios ar Pheadar atá i gcathair Iopae.’ Chuir Coirnéilias triúr fear go dtí Iopae, áit a bhí timpeall is 30 míle ó dheas de Chéasaráia, chun labhairt le Peadar.

Idir an dá linn bhí fís ag Peadar in Iopae. Chonaic sé ainmhithe nach raibh cead ag na Giúdaigh a ithe, agus chuala sé glór ag rá leis iad a ithe. Ach dhiúltaigh Peadar, ag rá: ‘Níor ith mé aon ainmhí a bhí neamhghlan riamh.’ Dúirt an glór leis ansin: ‘Ná bí ag rá go bhfuil an rud atá glanta ag Dia neamhghlan.’ Ansin, dúradh le Peadar: ‘Tá triúr fear ag do dhoras. Téigh in éineacht leo.’ Chuaigh Peadar go dtí an doras agus d’fhiafraigh sé de na fir cén fáth a raibh siad ann. D’fhreagair siad: ‘Chuir Coirnéilias, oifigeach airm Rómhánach, chugat muid. Tá ort a theacht go dtína theach i gCéasaráia.’ Thug Peadar cuireadh  dóibh fanacht thar oíche in éineacht leis. Lá arna mhárach, chuaigh sé leo go Céasaráia, agus chuaigh bráithre ó Iopae in éineacht leo.

Nuair a chonaic Coirnéilias Peadar, chuaigh sé síos ar a ghlúine. Ach dúirt Peadar: ‘Éirigh! Níl ionam ach fear ar nós tú féin. Dúirt Dia liom a theacht chugat cé nach dtéann na Giúdaigh isteach i dtithe na nGintlithe. Inis dom le do thoil, cén fáth ar chuir tú fios orm.’

Dúirt Coirnéilias le Peadar: ‘Ceithre lá ó shin bhí mé ag guí chun Dé agus dúirt aingeal liom fios a chur ort. Múin briathra Iehova dúinn le do thoil.’ Dúirt Peadar: ‘Tá sé foghlamtha agam nach bhfuil Dia claonta. Glacann sé le duine ar bith atá ag iarraidh é a adhradh.’ Mhúin Peadar go leor faoi Íosa do Choirnéilias agus dóibh siúd a bhí in éineacht leis. Ansin tháinig an spiorad naomh orthu, agus baisteadh iad go léir.