Roma asraafoiatsɛ ko ni abuɔ waa hi Kaisarea, ni egbɛ́i ji Kornelio. Eyɛ mli akɛ jeee Yudafonyo ji lɛ moŋ, shi Yudafoi lɛ bu lɛ. Efee ohiafoi kɛ mɛi ni bɛ nɔ ko lɛ ejurɔ. Kornelio he Yehowa nɔ eye ni esɔle ehã lɛ daa. Gbi ko lɛ, ŋwɛibɔfo ko ba Kornelio ŋɔɔ ni ekɛɛ lɛ akɛ: ‘Nyɔŋmɔ enu osɔlemɔi lɛ. Agbɛnɛ lɛ, tsu mɛi kɛya he ni Petro yɔɔ yɛ Yopa lɛ, ni amɛyatsɛ lɛ kɛba.’ Yopa yɛ Kornelio shĩa lɛ wuoyi, ni ekɛ jɛmɛ teŋ jekɛmɔ baashɛ kilomitai 50. Kornelio tsu mɛi kɛtee Petro ŋɔɔ amrɔ nɔŋŋ.

Be ni mɛi lɛ nyiɛ gbɛ lɛ, Petro na ninaa ko. Ena kooloi komɛi ni aŋmɛɛɛ Yudafoi lɛ gbɛ akɛ amɛye, shi enu ni gbee ko miikɛɛ lɛ akɛ eye. Petro kɛɛ eyeee. Ewie akɛ: ‘Miyeko nɔ ko ni abule ni he tseee dã.’ Kɛkɛ ni gbee lɛ kɛɛ lɛ akɛ: ‘Kaakɛɛ akɛ kooloi nɛɛ ahe tseee. Nyɔŋmɔ ehã amɛ fɛɛ amɛhe etse.’ Esaa ekɛɛ Petro akɛ: ‘Hii etɛ damɔ oshinaa lɛ naa. Okɛ amɛ aya.’ Petro tee shinaa lɛ naa ni ebi hii lɛ nɔ hewɔ ni amɛba jɛmɛ. Amɛhã hetoo akɛ: ‘Roma asraafoiatsɛ ko ni atsɛɔ lɛ Kornelio lɛ etsu wɔ oŋɔɔ. Ekɛɛ oba eshĩa lɛ yɛ Kaisarea.’ Petro hã amɛba mli, ni amɛwɔ jɛmɛ  nakai gbɛkɛ lɛ. Enɔ jetsɛremɔ lɛ, ekɛ amɛ fɛɛ tee Kaisarea, ni nyɛmimɛi komɛi ni yɔɔ Yopa lɛ fata amɛhe kɛtee.

Be ni amɛyashɛ, ni Kornelio na Petro lɛ, eho ekula shi. Shi Petro kɛɛ lɛ akɛ: ‘Tee shi! Mi hu gbɔmɔ ji mi tamɔ bo nɔŋŋ. Eyɛ mli akɛ Yudafoi eyaaa Jeŋmajiaŋbii ashĩai amli moŋ, shi Nyɔŋmɔ kɛɛ miba oshĩa lɛ. Ofainɛ, kɛɛmɔ mi nɔ hewɔ ni otsu ni abatsɛ mi kɛba lɛ.’

Kornelio kɛɛ Petro akɛ: ‘Ŋmɛnɛ ji gbii ejwɛ lɛ, miisɔle miihã Nyɔŋmɔ, kɛkɛ ni ŋwɛibɔfo ko kɛɛ mi akɛ mitsu ni ayatsɛ bo kɛba. Ofainɛ, tsɔɔmɔ wɔ Yehowa wiemɔi lɛ.’ Petro wie akɛ: ‘Mikase akɛ Nyɔŋmɔ kwɛɛɛ hiɛiaŋ. Ehãa mɔ fɛɛ mɔ ni miisumɔ ni ejá lɛ lɛ baa eŋɔɔ, ekɔɔɔ he eko mɔ ni eji.’ Petro tsɔɔ amɛ nibii pii yɛ Yesu he. Kɛkɛ ni mumɔ krɔŋkrɔŋ lɛ ba Kornelio kɛ mɛi fɛɛ ni kɛ lɛ yɔɔ jɛmɛ lɛ anɔ, ni abaptisi amɛ fɛɛ.