MoSesarea mwa ri omuhongore waRoma wovita omunanḓengu ngwa ri nena Kornelius. Nandarire kutja eye kari Omujuda, Ovajuda ve mu tengere. Eye aa vatere ovasyona novahepe. Kornelius wa ri nongamburiro mu Jehova nu aa kumbu ku ye aruhe. Eyuva rimwe, omuengeli we rimunikisa ku Kornelius na tja: ‘Mukuru wa zuva ozongumbiro zoye. Nambano hinda ovarumendu kotjihuro tjaJope, Petrus ke kara nu u mu ningire kutja me ye kove.’ Tjimanga Kornelius wa hinda ovarumendu 3 koJope, tji tjari ozokilometa ape 50 kuṱa komamuho.

Moruveze ndwo moJope, Petrus wina wa muna otjirimunikise. Eye wa muna ovipuka Ovajuda mbyaave ha yandjerwa okurya, okuzambo a zuu eraka nde mu raera kutja ma rye. Petrus wa panḓa na tja: ‘Ami hiya rora okurya otjipuka otjihakohoke momuinyo wandje.’ Eraka ra tja ku ye: ‘Oisana ouhakohoke movipuka mbi. Mukuru we vi kohorora.’ Petrus wina wa raerwa kutja, ‘Pe novarumendu 3 pomuvero wondjuwo yoye. Twende puna wo.’ Petrus wa ya komuvero na kapura ovarumendu kutja mave vanga ye. Owo va tja: ‘Eṱe twa hindwa i Kornelius, omuhongore waRoma wovita.  Ove mo sokuyenda puna eṱe koye koSesarea.’ Petrus we ve ningira kutja ve sekire poye. Eyuva ependukirwa, eye wa ya puna wo koSesarea pamwe novakambure ovakwao mba za koJope.

Kornelius wa wa kozongoro tja muna Petrus. Posiya Petrus wa tja ku ye: ‘Sekama! Owami omundu otja ove. Mukuru we ndji raere kutja hi ye koyoye nandarire kutja Ovajuda kave hiti mozondjuwo zomihoko vyarwe. Nambano arikana ndji raera kutja we ndji isanene tjike.’

Kornelius wa tja ku Petrus: ‘Omayuva yane nga kapita mba ri ame kumbu ku Mukuru nu omuengeli we ndji raere kutja hi ku isanise. Arikana ndji honga embo raMukuru.’ Petrus wa tja: ‘Ami mbe rihonga kutja Mukuru ke nambangu. Eye u yakura ovandu avehe mbe vanga okurikotamena ku ye.’ Petrus we ve honga oviṋa ovingi ohunga na Jesus. Okuzambo ombepo ondjapuke ye ya kombanda yaKornelius novandu avehe mba ri pamwe nowo va papitisiwa.