Ba Siseria, bisi seiku soldadu Rome ti bepangkat besai ke benama Kornelius. Taja pan iya ukai orang Judah, orang Judah bebasaka iya. Iya gerah jari mantu orang ke seranta enggau orang ke begunaka bantu. Kornelius arapka Jehovah sereta seruran besampi ngagai Iya. Bisi sekali, seiku melikat ngayanka diri ngagai Kornelius lalu bejaku: ‘Petara udah ningaka sampi nuan. Diatu asuh orang bejalai ngagai nengeri Jopa, endur Peter diau, lalu asuh iya betemu enggau nuan.’ Tekala nya, Kornelius nganjung tiga iku lelaki ngagai Jopa, kira-kira 50 km tunga ke selatan.

Maya nya mega, ba Jopa, Peter nerima siti genera. Iya meda jelu ke enda ulih diempa orang Judah, lalu iya ninga nyawa ke ngasuh iya makai jelu nya. Peter nulak, ku iya: ‘Tang aku nadai kala makai jelu ti enda tuchi.’ Nyawa nya bejaku baru enggau iya: ‘Anang ngumbai jelu tu enda tuchi. Sida udah dituchika Petara.’ Iya nambah: ‘Bisi tiga iku lelaki ba mua pintu nuan. Mupuk nuan enggau sida.’ Peter mansang ke pintu lalu nanya bala lelaki nya kebuah sida datai. Disaut sida: ‘Kornelius, seiku pemesai soldadu Rome ngasuh kami kitu. Nuan dipinta datai ngagai rumah iya ba  Siseria.’ Peter mai sida tiga bemalam dia. Ba hari siti, iya enggau sekeda menyadi Kristian ari Jopa mupuk enggau sida ngagai Siseria.

Lebuh Kornelius meda Peter, iya lalu besugang ba mua Peter. Tang ku Peter: ‘Angkat. Aku pan mensia baka nuan. Petara ngasuh aku datai ke rumah nuan, taja pan orang Judah enda tau tama ngagai rumah orang bansa bukai. Diatu padahka kebuah nuan minta aku datai kitu.’

Kornelius madah ngagai Peter: ‘Empat hari ti udah, lebuh aku besampi ngagai Petara, seiku melikat ngasuh aku mesanka nuan. Tulung ajar kami jaku Jehovah.’ Ku Peter: ‘Aku nemu Petara endang amat enda bepilih mata. Iya nerima barang sapa ke deka nyembah Iya.’ Peter ngajar sida mayuh utai pasal Jesus. Udah nya, roh kudus datai ngagai Kornelius sereta orang ke bisi dia enggau iya, lalu semua sida dibaptisa.