KPƐLƖKƲƲ 97
Fezuu kiɖeɖeu tibi Kɔɔrnɛɛyɩ yɔɔ
Roma sɔdʋʋ sɔsɔ nɔɔyʋ kaawɛ Sezaaree tɛtʋ taa nɛ payaɣ-ɩ se Kɔɔrnɛɛyɩ. Ɛtɩkɛ Yuuda tʋ, ɛlɛ Yuuda ñɩma ñaŋaɣ-ɩ. Ɛɛkɛ kʋjɔʋ tʋ weyi ɛsɩɣaɣnɩ kʋñɔndɩnaa yɔ. Kɔɔrnɛɛyɩ kaawɛnɩ tisuu Yehowa yɔɔ nɛ ɛtɩmɩɣnɩ-ɩ ɖoŋ ɖoŋ. Kɩyakʋ nakʋyʋ lɛ, Ɛsɔ tiyiyu nɔɔyʋ yɔɔdɩnɩ-ɩ nɛ eheyi-i se: ‘Ɛsɔ welisi ña-adɩma. Tiyi nabɛyɛ Yopee tɛtʋ taa, ɖenɖe Pɩyɛɛrɩ wɛɛ yɔ, nɛ peheyi-i se ɛkɔɔ nɛ ɛna-ŋ.’ Kpaagbaa mbʋ lɛ, Kɔɔrnɛɛyɩ tiyi abalaa naadozo Yopee tɛtʋ taa. Tɛtʋ ndʋ, tɩɩwɛ Sezaaree nɛ hadɛ kiŋ ɛzɩ kilomɛtanaa 48 mbʋ yɔ.
Alɩwaatʋ ndʋ tɩ-taa lɛ, Pɩyɛɛrɩ kaawɛ Yopee nɛ ɛna natʋ natʋyʋ taa kpɩna ndɩ ndɩ wena paɖʋ paɣtʋ Yuuda ñɩma se pataatɔɔ yɔ. Nɛ ɛnɩɩ nɔɔ nakɛyɛ taŋ nɛ keheyi-i se ɛtɔɔ kpɩna ana a-nandʋ. Pɩyɛɛrɩ kizi nɛ ɛyɔɔdɩ se: ‘Wiɖiyi mantɩtɔɔ kpɩna wena afɛyɩ kele kele yɔ, a-nandʋ.’ Pʋwayɩ lɛ, nɔɔ ŋga keheyi-i se: ‘Taayɔɔdɩ se kpɩna ana afɛyɩ kele kele. Ɛsɔ yeba nɛ awɛɛ kele kele.’ Peheyi Pɩyɛɛrɩ ɖɔɖɔ se: ‘Abalaa nabɛyɛ wɛ ñɔ-nɔnɔɔ taa, pɛkpɛndɩ naadozo. Tɩŋ pa-wayɩ.’ Pɩyɛɛrɩ wolo nɔnɔɔ taa nɛ ɛpɔzɩ abalaa mba se le palɩnaa? Pocosi-i se: ‘Roma sɔdʋʋ sɔsɔ
weyi payaɣ se Kɔɔrnɛɛyɩ yɔ, ɛnʋ tiyini-ɖʋ. Pɩpɔzʋʋ se ŋwolo ɛ-tɛ Sezaarɩ tɛtʋ taa.’ Pɩyɛɛrɩ heyi abalaa mba se pasʋʋ ɛ-tɛ ɖoo ana. Teu fema lɛ, ɛ nɛ Yopee koobiya nabɛyɛ patɩŋ abalaa mba pa-wayɩ.Kɔɔrnɛɛyɩ tɩɩna Pɩyɛɛrɩ lɛ, eluŋ ɛ-nʋmbɔla yɔɔ. Ɛlɛ Pɩyɛɛrɩ heyi-i se: ‘Kʋyɩ! Mɛnkɛ ɛyʋ ɛzɩ ña yɔ. Ɛsɔ heyini-m se mɔnkɔɔ ñɛ-tɛ, paa Yuuda ñɩma ɩɩsʋʋ sɩɩnaa layaa ɖɩsɩ taa yɔ. Lɛɛlɛɛyɔ, mentendi-ŋ, heyi-m mbʋ pʋyɔɔ ŋtiyaa se paya-m yɔ.’
Kɔɔrnɛɛyɩ heyi Pɩyɛɛrɩ se: ‘Kɩyakɩŋ naanza weyi ɩɖɛwa yɔ ɩ-taa, maawɛɛ nɛ mantɩmɩɣnɩ Ɛsɔ, nɛ tiyiyu nɔɔyʋ heyi-m se mentiyi nɛ paya-ŋ. Mentendi-ŋ, wɩlɩ-ɖʋ Yehowa tɔm.’ Pɩyɛɛrɩ yɔɔdɩ se: ‘Lɛɛlɛɛyɔ, manawa se Ɛsɔ ɛɛtʋkʋʋ ɛyaa taa. Ɛmʋʋ mba payɩ pɔsɔɔlaa se pɛsɛɛ-ɩ yɔ.’ Pɩyɛɛrɩ wɩlɩ-wɛ tɔm sakɩyɛ Yesu yɔɔ. Pʋwayɩ lɛ, fezuu kiɖeɖeu tii Kɔɔrnɛɛyɩ nɛ mba payɩ paawɛ ɛ-cɔlɔ peeɖe yɔ, pɔ-yɔɔ, nɛ pamɩyɩsɩ-wɛ lɩm.
“Paa ɛjaɖɛ nɖɩ ɖɩ-taa, weyi ɛñaŋ [Ɛsɔ] nɛ ɛlakɩ tɔm kiɖeɖetu yɔ, eɖeɣni-i.”—Tʋma Labʋ 10:35