Thĩinĩ wa Kaisarea nĩ kwarĩ mũnene ũmwe wa thigari cia Roma wetagwo Korinelio. O na gũtuĩka ndaarĩ Mũyahudi, nĩ aaheetwo gĩtĩo mũno nĩ Ayahudi. Nĩ aateithagia athĩni na arĩa maabataraga ũteithio. Korinelio nĩ eetĩkĩtie Jehova na nĩ aahoyaga kaingĩ. Mũthenya ũmwe, nĩ oimĩrĩirũo nĩ mũraika na akĩmwĩra ũũ: ‘Ngai nĩ aiguĩte mahoya maku. Tũma andũ itũũra-inĩ rĩa Jopa, kũrĩa Petero aikaraga, mamwĩre oke gwaku.’ Korinelio nĩ aatũmire andũ atatũ o hĩndĩ ĩyo itũũra-inĩ rĩa Jopa, rĩrĩa rĩarĩ kĩndũ ta kilomita 50 mwena wa mũhuro wa Kaisarea.

O ihinda-inĩ rĩu, Petero arĩ itũũra-inĩ rĩa Jopa nĩ onire kĩoneki. Onire nyamũ iria Ayahudi mataagĩrĩirũo nĩ kũrĩa na agĩcoka akĩigua mũgambo wamwĩra acirĩe. Petero nĩ aaregire kũrĩa na akiuga ũũ: ‘Niĩ ndirĩ ndarĩa nyama cia nyamũ itarĩ theru ũtũũro-inĩ wakwa wothe.’ Naguo mũgambo ũcio ũkĩmwĩra ũũ: ‘Tiga kuuga nyamũ icio ti theru. Ngai nĩ acitheretie.’ Ningĩ nĩ eerirũo ũũ: ‘Harĩ na andũ atatũ marũngiĩ gwaku mũrango-inĩ. Thiĩ hamwe nao.’ Petero nĩ aathiire na akĩmoria kĩrĩa gĩatũmĩte makorũo hau mũrango-inĩ. Maamwĩrire ũũ: ‘Twatũmwo nĩ Korinelio mũnene wa  thigari cia Roma. No mũhaka ũthiĩ gwake mũciĩ itũũra-inĩ rĩa Kaisarea.’ Petero nĩ aanyitire andũ acio ũgeni na makĩraara gwake. Mũthenya ũrĩa warũmĩrĩire, nĩ athiire hamwe nao Kaisarea marĩ na ariũ a ithe witũ amwe kuuma Jopa.

Rĩrĩa Korinelio onire Petero, nĩ aamũturĩirie maru. No Petero akĩmwĩra ũũ: ‘Rũgama! Niĩ ndĩ mũndũ o tawe. Ngai anjĩrire njũke gũkũ gwaku o na akorũo Ayahudi matithiaga kwa andũ a Ndũrĩrĩ. Ndagũthaitha ũnjĩre kĩrĩa gĩtũmĩte ũndũmanĩre.’

Korinelio eerire Petero ũũ: ‘Ndĩrahoyaga Ngai thikũ inya hĩtũku, nake mũraika aranjĩra ngũtũmanĩre. Ndagũthaitha ũtũrute ũhoro wa Jehova.’ Petero oigire ũũ: ‘Nĩ ndĩrutĩte atĩ Ngai ndarĩ mũthutũkanio. Nĩ etĩkĩraga mũndũ o wothe wendaga kũmũthathaiya.’ Petero nĩ aamarutire maũndũ maingĩ megiĩ Jesu. Thutha ũcio Korinelio hamwe na andũ arĩa othe marĩ nake nĩ maaheirũo roho mũtheru, na makĩbatithio.