មេរៀនទី៩៧
កូនេលាសទទួលឫទ្ធានុភាពបរិសុទ្ធ
នៅក្រុងសេសារៀ មានមន្ត្រីរ៉ូមជាន់ខ្ពស់ម្នាក់ឈ្មោះកូនេលាស។ គាត់មិនមែនជាជនជាតិយូដាទេ តែជនជាតិយូដាគោរពគាត់ ពីព្រោះគាត់មានចិត្តទូលាយ ជួយជនក្រីក្រ និងអ្នកខ្វះខាត។ កូនេលាសមានជំនឿលើព្រះយេហូវ៉ា ហើយអធិដ្ឋានទៅលោកជានិច្ច។ នៅថ្ងៃមួយ មានទេវតាមួយរូបលេចមកប្រាប់កូនេលាសថា៖ ‹ព្រះបានឮសេចក្ដីអធិដ្ឋានរបស់អ្នក។ ដូច្នេះ ចូរចាត់បុរសខ្លះឲ្យទៅក្រុងយ៉ុបប៉ា ដើម្បីអញ្ជើញពេត្រុសឲ្យមកជួបអ្នក›។ ភ្លាមៗនោះ កូនេលាសបានចាត់បុរសបីនាក់ឲ្យទៅក្រុងយ៉ុបប៉ា ដែលនៅខាងត្បូងក្រុងសេសារៀ ចម្ងាយប្រហែល៥០គីឡូម៉ែត្រ។
ដំណាលគ្នានោះ នៅក្រុងយ៉ុបប៉ា ព្រះបានឲ្យពេត្រុសឃើញក្នុងគំនិត។ គាត់ឃើញសត្វខ្លះដែលជនជាតិយូដាហាមបរិភោគ តែឮសំឡេងមួយប្រាប់ឲ្យបរិភោគសត្វទាំងនោះ។ ប៉ុន្តែ ពេត្រុសបដិសេធថា៖ ‹ខ្ញុំមិនដែលបរិភោគសត្វមិនស្អាតទេ›។ រួចមក សំឡេងនោះប្រាប់គាត់ថា៖ ‹កុំហៅសត្វទាំងនោះថាមិនស្អាតឡើយ។ ព្រះបានធ្វើឲ្យពួកវាស្អាតហើយ›។ សំឡេងនោះប្រាប់ទៀតថា៖ ‹បុរសបីនាក់កំពុងឈរនៅមាត់ទ្វារផ្ទះរបស់អ្នក។ ចូរទៅជាមួយនឹងពួកគេ›។ ពេត្រុសចេញទៅមាត់ទ្វារ ហើយសួរពួកគេថា៖ ‹តើពួកអ្នកមកទីនេះមានការអ្វី?›។ ពួកគេឆ្លើយថា៖ ‹មេទ័ពរ៉ូមឈ្មោះកូនេលាស បានឲ្យពួកយើងមកអញ្ជើញអ្នកទៅផ្ទះរបស់គាត់នៅក្រុងសេសារៀ›។ ពេត្រុសបានអញ្ជើញបុរសទាំងនោះ ឲ្យស្នាក់នៅផ្ទះគាត់មួយយប់។ លុះស្អែកឡើង គាត់និងបុរសទាំងនោះចេញទៅក្រុងសេសារៀ រួមជាមួយនឹងបងប្អូនខ្លះពីក្រុងយ៉ុបប៉ា។
ពេលកូនេលាសឃើញពេត្រុស គាត់លំឱនកាយនៅទាបជើងរបស់ពេត្រុស។ ប៉ុន្តែ ពេត្រុសនិយាយថា៖ ‹ចូរក្រោកឡើង! ខ្ញុំក៏ជាមនុស្សដូចអ្នកដែរ។ ព្រះបានប្រាប់ខ្ញុំឲ្យមកផ្ទះរបស់អ្នក ទោះជាជនជាតិយូដាមិនទៅផ្ទះជនជាតិដទៃក៏ដោយ។ ឥឡូវសូមប្រាប់ខ្ញុំ ហេតុអ្វីបានជាអ្នកអញ្ជើញខ្ញុំមក?›។
កូនេលាសប្រាប់ពេត្រុសថា៖ ‹បួនថ្ងៃមុន ពេលខ្ញុំកំពុងអធិដ្ឋានទៅព្រះ ទេវតាមួយបានប្រាប់ខ្ញុំឲ្យចាត់គេទៅអញ្ជើញអ្នកមកផ្ទះខ្ញុំ។ សូមបង្រៀនយើងអំពីប្រសាសន៍របស់ព្រះយេហូវ៉ា›។ ពេត្រុសនិយាយថា៖ ‹ឥឡូវខ្ញុំយល់ច្បាស់ថា ព្រះមិនរើសមុខឡើយ។ លោកទទួលអស់អ្នកដែលចង់គោរពប្រណិប័តន៍លោក›។ ពេត្រុសបានបង្រៀនពួកគេនូវអ្វីៗជាច្រើនអំពីលោកយេស៊ូ។ ពេលនោះ ឫទ្ធានុភាពបរិសុទ្ធបានមកសណ្ឋិតលើកូនេលាស និងអស់អ្នកដែលនៅទីនោះជាមួយគាត់ ហើយពួកគេគ្រប់គ្នាបានទទួលការជ្រមុជទឹក។
«នៅគ្រប់ប្រជាជាតិ អ្នកណាដែលកោតខ្លាច[ព្រះ] ហើយប្រព្រឹត្តអ្វីដែលត្រឹមត្រូវ លោកពេញចិត្តអ្នកនោះ»។—សកម្មភាព ១០:៣៥
លោកអ្នកក៏ប្រហែលជាចូលចិត្តដែរ
ទស្សនាវដ្ដី
តើលោកអ្នកដឹងឬទេ? លេខ២ ឆ្នាំ២០១៦
តើមេបញ្ជាការកងទ័ពរ៉ូមមានតួនាទីអ្វី? តើកញ្ចក់នៅសម័យគម្ពីរខុសគ្នាពីសព្វថ្ងៃនេះយ៉ាងដូចម្ដេច?
