Wan impɔtant Roman ami ɔfisa we nem Kɔnilyɔs bin de na Sizeria. Pan ɔl we in nɔto Ju, di Ju pipul dɛn bin rɛspɛkt am. I bin de ɛp po pipul dɛn ɛn pipul dɛn we nid ɛp. Kɔnilyɔs biliv Jiova, ɛn i bin de pre to am ɔltɛm. Wan de, wan enjɛl apia to Kɔnilyɔs ɛn tɛl am se: ‘Gɔd dɔn yɛri yu prea dɛn. Naw sɛn man dɛn na Jɔpa usay Pita de, ɛn tɛl am fɔ kam mit yu.’ Wantɛm wantɛm, Kɔnilyɔs sɛn tri man dɛn na Jɔpa, we de lɛk 30 mayl so fɔ go na di sawt.

Dɛn tɛm dɛn de, Pita si wan vishɔn we i de na Jɔpa. I si animal dɛn we di Ju pipul dɛn nɔ fɔ it, ɛn i yɛri wan vɔys de tɛl am fɔ it dɛn. Bɔt Pita nɔ gri fɔ it dɛn, ɛn i tɔk se: ‘Bɔt a nɔ ɛva it animal dɛn we nɔ klin.’ Di vɔys tɛl am se: ‘Nɔ tɔk se dɛn animal dɛn ya nɔ klin. Gɔd dɔn mek dɛn klin.’ I tɛl Pita bak se: ‘Tri man dɛn de na yu domɔt. Go wit dɛn.’ Pita go na di domɔt, ɛn i aks di man dɛn wetin dɛn de du de. Dɛn ansa se: ‘Na wan Roman ami ɔfisa we nem Kɔnilyɔs na in sɛn wi. Yu fɔ go na in os na Sizeria.’ Pita tɛl di man dɛn fɔ slip na in os. Di nɛks de, i go wit dɛn na Sizeria wit sɔm brɔda dɛn na Jɔpa.

Kɔnilyɔs nil dɔŋ we i faynali si Pita. Bɔt Pita tɛl am se: ‘Grap! Mi na mɔtalman jɔs lɛk yu. Gɔd tɛl mi fɔ kam na yu os pan ɔl we Ju dɛn nɔ de go na Jɛntayl dɛn os dɛn. Duya tɛl mi wetin mek yu se lɛ a kam.’

Kɔnilyɔs tɛl Pita se: ‘A bin de pre to Gɔd dis sem tɛm; tide mek 4 dez frɔm da tɛm de, ɛn wan enjɛl tɛl mi fɔ sɛn kɔl yu. Duya tich wi bɔt Jiova.’ Pita tɔk se: ‘A dɔn lan se Gɔd nɔ de tek wan pɔsin bɛtɛ pas ɔda pɔsin. I de tek ɛnibɔdi we want fɔ wɔship am.’ Pita tich dɛn bɔku tin dɛn bɔt Jizɔs. Dɔn oli spirit kam pan Kɔnilyɔs ɛn ɔl di wan dɛn we bin de wit am, ɛn dɛn ɔl bin baptayz.