Laŋunɔ pilɛ wa o Sisaliaa niŋ diolaŋ aa Kɔniiliɔɔ. Wana bɛndu puaa chɔuwaa maLuomaŋnda opilɛ o wa ni. Mi che bɛɛ o ve Chuunɔ le, kɛ bɛɛleŋ pila Chuuwa ndaa nɔ le ndu ni. Mi ndoo mala wanaa bala fonduaa, a wanaa wa o bahawɛilaŋ niŋnda. Kɔniiliɔɔ ndoo laalaŋ o Chɛhowa niŋ. Nduyɛ mi ndoo piɛi teleŋ o teleŋ o ndu lo. Paale pilɛ, mi maalikɛinɔɔ fula Kɔniiliɔɔ o hɔl, mbo dimul ndu aa: ‘Mɛlɛka tuei piɛile numndeŋ. Viom puaa Chopa chiee, ma kuɛ naa Pitɛ cho o yiya wa, le ma dimul ndu mbo hiŋ naa num chua.’ O lepilɛ niŋ kpe, mi Kɔniiliɔɔ viam puaa a yaa Chopa. Nduyɛ tiŋndo wa le kɔla kilola 50.

A boondii keŋ, Pitɛ wa Chopa mbo cha yilaŋndo. Mbo cha visiaa Chuuwa ndaa nɔ ma de kposoŋ te wa. Mbo tuɛi mi diomndo wa ndu dimullo aa dio. Kɛ mi Pitɛ kɛɛ. Mbo dimi aa: ‘Lepilɛ bɛɛ I di wɔ visi nɔɔlɛiyo o yoomu nuu niŋ te.’ Mi diomndo dimul ndu aa: ‘Pɛŋgi visiaa haa veeloo visiaa nɔɔlɛiya. Kanifuule, Mɛlɛka chii nda dindi.’ Mbo dimul vɛlɛ Pitɛ aa: ‘Puaa a yaa cho num chumndo o dio. La kɔ nya ndaa.’ Mɛɛ Pitɛ kuɛ o dio, mbo kɔ nyuna nda le sabu nda hiŋndo. Ma mulul ndu aa: ‘Kɔniiliɔɔ vem naa ni, wana bɛndu puaa chuwaa  maLuomaŋnda opilɛ. O dimi maa num komal ndu o chiɛi ndɔɔ Sisaliaa.’ Mi Pitɛ yiya puaa haa le ma lɔl loŋ ichɔl koŋ. Diimandɔɔ, mi Pitɛ, puaa haa, a puaapiliaa fula Chopa wa apum kua Sisaliaa.

O mɛɛlulaŋ kpɔŋ, mɛɛ Kɔniiliɔɔ che Pitɛ, mbo beŋ ndu wulaŋ. Kɛ mi Pitɛ dimul ndu aa: ‘Chɔŋ! Wanachioo ya cho ni maa num. Mi che bɛɛ Chuuwa luei o chiɛila wanaa cho ŋChuu le wa niŋ te, kɛ Mɛlɛka vem ya le hunɔɔ naa num chua ni. Yandii, chɔm ya le sabu ŋ veelu ya wo.’

Mi Kɔniiliɔɔ dimul Pitɛ aa: ‘O cho niŋ hau palɛi i hiɔɔlu mɛɛ ya wa piɛileŋ naa Mɛlɛka chua, mi maalikɛinɔɔ dimul la maa ya viom waŋnda naa num chua. Yandii, pɛɛku naa a Chɛhowa okɔɔ.’ Mi Pitɛ dimi aa: ‘I sina niŋ kɛsɛ maa Mɛlɛka hɛli ŋwaŋnda chiee le. Kɛ wana o wana yeema ndu pɛ piɛiyo, chɛlɔɔ o chɛl ndu ni.’ Mi Pitɛ pɛɛku nda sɔɔŋ bɔɔbɔɔ a Chiisu okɔɔ. Okoŋ, mi nyina Mɛlɛkaa tual Kɔniiliɔɔ choo a wanaa wa o ndu lo chiɛiniŋ nda. Nduyɛ mi nda kpou sɔla yiŋɔɔ.