တၢ်မၤလိ ၉၇
စီၤကန့လံးဒိးန့ၢ်ဘၣ်သးစီဆှံ
လၢဝ့ၢ်ကဲၤစါရံၤအပူၤ ရိမ့ၤအသုးခိၣ်အိၣ်ဝဲတဂၤ, အမံၤမ့ၢ်ဝဲစီၤကန့လံးန့ၣ်လီၤ. စီၤကန့လံးတမ့ၢ် ပှၤယူဒၤဖိဘၣ် ဘၣ်ဆၣ် ပှၤယူဒၤဖိတဖၣ်ပာ်ကဲအီၤလီၤ. အဝဲမၤစၢၤဘၣ်ဝဲ ပှၤဖှီၣ်ဖိယာ်ဖိတဖၣ်လၢ တၢ်သးအိၣ်အပူၤလီၤ. စီၤကန့လံးနာ်ယဟိဝၤယွၤ ဒီးဃ့ဘါထုကဖၣ်တၢ်လၢ အအိၣ်ထီဘိလီၤ. ဘၣ်တနံၤ မူခိၣ်ကလူးတဂၤလီၣ်ဖျါထီၣ်အသးလၢ စီၤကန့လံးအမဲာ်ညါဒီးတဲဝဲလၢ– ‘ကစၢ်ယွၤနၢ်ဟူ နတၢ်ဘါထုကဖၣ်လံ. ဆှၢလီၤပိာ်ခွါတဖၣ်ဆူ ဝ့ၢ်ယၤဖိၤလၢစီၤပ့းတရူး အိၣ်တၢ်လီၢ်ဒီးမၢအဟဲဆူ နအိၣ်တက့ၢ်.’ တဘျီဃီန့ၣ် စီၤကန့လံးဆှၢလီၤပိာ်ခွါသၢဂၤဆူ ဝ့ၢ်ယၤဖိၤလၢအယံၤဝဲ အမံးလာ် ၃၀ ဃၣ်ဃၣ်လၢကလံၤထံးတပၤန့ၣ်လီၤ.
ဖဲန့ၣ်အခါ လၢဝ့ၢ်ယၤဖိၤအပူၤန့ၣ် စီၤပ့းတရူးထံၣ်ဝဲ တၢ်ထံၣ်လၢညါခီတခါလီၤ. စီၤပ့းတရူး ထံၣ်ဘၣ်ဝဲဆၣ်ဖိကီၢ်ဖိတဖၣ်လၢ ပှၤယူဒၤဖိအီၣ်ဝဲတန့ၢ်ဘၣ်ဒီး အဝဲနၢ်ဟူတၢ်ကလုၢ်တဲဘၣ်အီၤလၢ အီၣ်ဆၣ်ဖိကီၢ်ဖိတဖၣ်အံၤတက့ၢ်. ဒီးစီၤပ့းတရူး တဲဆၢက့ၤဝဲလၢ– ‘လၢယတၢ်အိၣ်မူအပူၤန့ၣ် ဆၣ်ဖိကီၢ်ဖိလၢ အတကဆှီဘၣ်တဖၣ်အံၤ ယတအီၣ်အီၤနီတဘျီဘၣ်.’ ဝံၤဒီး တၢ်ကလုၢ်တဲဘၣ်အီၤလၢ– ‘တဘၣ်တဲဒ်န့ၣ်တဂ့ၤ, ဆၣ်ဖိကီၢ်ဖိတဖၣ်အံၤ ကစၢ်ယွၤမၤကဆှီထီၣ်ဝဲဝံၤလံ.’ ဒီးတဲဘၣ်စ့ၢ်ကီး စီၤပ့းတရူးလၢ– ‘ပိာ်ခွါသၢဂၤအိၣ်လၢနပဲတရီအမဲညါ, လဲၤဒီးအဝဲသ့ၣ်တက့ၢ်.’ စီၤပ့းတရူးလဲၤဆူ အပဲတရီမဲာ်ညါဒီး သံကွၢ်ပိာ်ခွါတဖၣ်အံၤလၢ ဘၣ်မနုၤအဃိ အဝဲသ့ၣ်ဟဲဖဲအံၤလဲၣ်. အဝဲသ့ၣ်စံးဆၢဝဲလၢ– ‘ရိမ့ၤအသုးခိၣ်စီၤကန့လံး ဆှၢလီၤပှၤလီၤ. နကဘၣ်လဲၤလၢအဟံၣ်လၢ ကဲၤစါရံၤလီၤ.’
စီၤပ့းတရူး ကွဲမုာ်ပိာ်ခွါတဖၣ်အံၤလၢ ကမံတ့ၢ်ဝဲလၢ အဟံၣ်တနၤလီၤ. လၢခံတနံၤ စီၤပ့းတရူးလဲၤဒီးအဝဲသ့ၣ်လၢ ကဲၤစါရံၤ ဃုာ်ဒီးဒီပုၢ်ဝဲၢ်ခွါတနီၤလၢ ယၤဖိၤလီၤ.ဖဲစီၤကန့လံးထံၣ်ဘၣ် စီၤပ့းတရူးအခါ အဝဲချံးလီၤအခီၣ်လၢ စီၤပ့းတရူးအမဲာ်ညါလီၤ. ဘၣ်ဆၣ် စီၤပ့းတရူးတဲဝဲလၢ– ‘ဂဲၤဆၢထၢၣ်သၢၣ်, ယမ့ၢ်ပှၤဟီၣ်ခိၣ်ဖိ ဒ်သိးဒီးနၤလီၤ. ပှၤယူဒၤဖိတဖၣ်တလဲၤနုာ်လၢ ပှၤတခီဘီမုၢ်ဖိအဟံၣ်ပူၤဘၣ်. ဘၣ်ဆၣ် ကစၢ်ယွၤမၢယဟဲလၢနဟံၣ်လီၤ. ဝံသးစူၤ တဲဘၣ်ယၤ ဘၣ်မနုၤအဃိ နမၢယဟဲလၢနအိၣ်လဲၣ်.’
စီၤကန့လံးတဲဘၣ်စီၤပ့းတရူးလၢ– ‘လၢအပူၤကွံာ်လွံၢ်သီန့ၣ် ယဃ့ဘါထုကဖၣ်တၢ်ဆူ ကစၢ်ယွၤ အအိၣ် ဒီးမူခိၣ်ကလူးတဂၤမၢ ယဆှၢလီၤပိာ်ခွါတဖၣ်လၢ ကလဲၤကိးန့ၢ်နၤလီၤ. ဝံသးစူၤ သိၣ်လိပှၤ ဘၣ်ဃးဒီး ယဟိဝၤယွၤအကလုၢ်ကထါနီၤ.’ စီၤပ့းတရူးတဲဝဲလၢ– ‘ခဲအံၤ ယသ့ၣ်ညါလၢ ကစၢ်ယွၤတကွၢ်ဒိၣ်ဆံးအါစှၤတၢ်ဘၣ်. ကယဲၢ်ပှၤလၢ အအဲၣ်ဒိးဘူၣ်ထီၣ်ဘါထီၣ်အီၤန့ၣ် ကစၢ်ယွၤတူၢ်လိာ်ဝဲလီၤ.’ အဃိ စီၤပ့းတရူးသိၣ်လိအဝဲသ့ၣ် ဘၣ်ဃးဒီးယ့ၣ်ၡူးအဂ့ၢ်အါမးလီၤ. ဝံၤဒီး သးစီဆှံဟဲလီၤလၢစီၤကန့လံး ဒီးပှၤလၢအအိၣ်ဒီးအီၤတဖၣ်အလိၤ ဒီးအဝဲသ့ၣ်ခဲလၢာ် ဒိးဘျၢအသးလၢထံလီၤ.
“မ့ၢ်အတူၢ်လိာ်ပှၤလၢအပျံၤအီၤ, ဒီးမၤတၢ်တီတၢ်လိၤလၢ ပှၤကိးကလုာ်ဒဲးအကျါလီၤ.”—မၤတၢ် ၁၀:၃၅