MoKesareya mwa kere mugara gefumano, gedina Koroneliusa, mupitisili govakwayita. Nampili ngomu ga dilire kukara Mujuda, nye Vajuda kwa mu fumadekere. Age nga kwafa unene vahepwe. Koroneliusa kwa pulire mwaKarunga ntani nga kanderere nkenye apa. Ezuva limwe, muengeli ta monekere Koroneliusa nokumutantera asi: ‘Karunga ana zuvhu makanderero goge. Tuma nye vagara vamwe koJope, oku ga kara Peturusa, va ka mu rete koge.’ Makura Koroneliusa ta tumu vagara vatatu koJope, sinano sokusika konokilometa 48 ngoso.

MoJope, Peturusa ta mono emoneko. Ta mono yikorama eyi va dilire kupulisira Vajuda kuyilya, makura ezwi tali mu tantere asi gusa o lye. Peturusa ta nyoka nokutanta asi: ‘Kapi na lya rumwe sikorama sokunyata.’ Ezwi tali mu tantere asi: ‘Wa ha ninka yikorama eyi asi yanyata. Karunga ga yi kuhura. Peturusa tava mu tantere asi: ‘Poveli vagara vatatu pevero lyoge vana kukupapara. Zende nawo.’ Peturusa tazi kevero nokukapura vagara owo eyi vana hara. Tava mu limburura asi: ‘Koroneliusa, mupitisili govakwayita yige  ana tu tumu. Asi o ze kembo lyendi koKesareya.’ Peturusa makura ta hwilida owo vagenda vendi membo. Ezuva lyokukwama ko, Peturusa ta zi nawo koKesareya novakwawo vamwe wokoJope.

Koroneliusa apa ga mwene Peturusa, ta tu nongoro pevhu. Nye Peturusa ta mu tantere asi: ‘Katuka! Namesi ni muntu tupu. Karunga ana tumu nge ni wize membo lyoge, mpili ngomu Vajuda ava dili kuza momambo govapagani. Tantera nge eyi muna zigidire nge.’

Koroneliusa ta tantere Peturusa asi: ‘Mazuva gane gana piti po kani kanderere kwaKarunga, yipo muengeli ka tanterere nge ni ku tumine. Tu ronga nonkango daJehova.’ Peturusa ta tanta asi: ‘Nina diva asi Karunga kapi ga paka mpongo. Age kutambura nkenye ogu ana hara kumukarera.’ Peturusa kwa va rongere yininke yoyinzi kuhamena Jesus. Mpepo zokupongoka tazi hegumukire Koroneliusa nanavenye ava va kere po, makura tava va kuhu.