Mwa Sesarea, nekupila muzamaisi wa masole wa Muroma yanaakutekeha yabizwa Kornele. Nihaike kuli nesi Mujuda, Majuda neba mukuteka. Naatusize babotana ni batu bane bali mwa butokwi. Kornele naalumela ku Jehova mi naalapelanga ku yena nako kaufela. Zazi leliñwi, lingeloi lataha ku Kornele mi lali ku yena: ‘Mulimu uutwile litapelo zahao. Cwale ulume baana kuli baye kwa tolopo ya Jopa, ili kwapila Pitrosi, mi bayo mukupa kuli atahe.’ Honafo feela, Kornele aluma baana babalaalu kuya kwa Jopa, ili likilomita zebato eza 50 kuya kwa mboela.

Hanaali mwa Jopa, Pitrosi abona pono. Abona lifolofolo zene bahanisizwe Majuda kuli basike baca, mi autwa linzwi lene libulela kuli ace lifolofolo zeo. Pitrosi ahana, mi ali: ‘Kono hanisika ca fateñi folofolo yesika kena mwa bupilo bwaka.’ Cwale linzwi kihaa lili ku yena: ‘Usike wabiza lifolofolo ze kuli halisika kena. Mulimu ulikenisize.’ Linzwi hape nelibulelezi Pitrosi kuli: ‘Kunani baana babalaalu fa munyako wahao. Zamaya ni bona.’ Pitrosi aya kwa munyako mi abuza baana bao zene babata. Baalaba kuli: ‘Lulumilwe ki Kornele, yali muzamaisi wa masole wa Muroma. Uswanela kuya kwa ndu yahae mwa Sesarea.’ Pitrosi akupa  baana bao kuli balobale busihu kaufela sina baenyi bahae. Habusa, aya ni bona kwa Sesarea, hamohocwalo ni mizwale babañwi ba mwa Jopa.

Kornele hanaaboni Pitrosi, akubama fafasi ka mañwele. Kono Pitrosi ali: ‘Yema! Ni mutu feela sina wena. Mulimu unibulelezi kuli nitahe kwa ndu yahao, nihaike kuli Majuda habakenangi mwa mandu a ba Macaba. Kacwalo, nitaluseze libaka hane ulumile batu kuli bayo nibiza.’

Kornele kihaa li ku Pitrosi: ‘Mazazi amane kwamulaho, nenilapela ku Mulimu, mi lingeloi lanitaluseza kuli niyo kubiza. Lwakupa, hakululute manzwi a Jehova.’ Pitrosi kihaa li: ‘Niitutile kuli Mulimu haketululi. Uamuhela mutu kaufela yabata kumulapela.’ Pitrosi abaluta litaba zeñata ka za Jesu. Cwale moya okenile wataha fahalimwaa Kornele ni batu bane bali ni yena, mi kaufelaa bona bakolobezwa.