Mu Kesalea, mwādi mudyavita umo mulēme mwine Loma witwa bu Konilusa. Nansha byākadipo muyuda, Bayuda bādi bamulēmeke. Wādi ukwasha na mutyima tō balanda ne bakolelwe. Konilusa wādi ukulupile mudi Yehova kadi wādi umulomba kitatyi ne kitatyi. Difuku dimo, mwikeulu umo wāmwekele Konilusa wāmunena’mba: ‘Leza waivwana milombelo yobe. Pano tuma bantu ku kibundi kya Yopa, kushikatanga Petelo, umwityije āye kuno kobe.’ Ponka na ponka, Konilusa wātuma bana-balume basatu ku Yopa, dya kunshi ku makilometele asenselela ku 50.

Mu kine kitatyi’kya, Petelo nandi wāmona kimonwa mu Yopa. Wāmona banyama bādi bajidikilwe Bayuda kudya’bo, wāivwana ne diwi dimulombola ebadye. Petelo wāpela na kunena’mba: ‘Inoko kashā mbutulwa nkyadile nyama wa disubi.’ Kupwa diwi dyāmunena’mba: ‘Koketa bano banyama bu ba disubi. Leza webatōkeja.’ Kadi dino diwi dyānena Petelo amba: ‘Kudi beni basatu badi ku kibelo kya njibo yobe. Enda nabo.’ Petelo wāenda ku kibelo kukepangula bano beni basatu kine kyobaila. Nabo bāmulondolola’mba: ‘I Konilusa, mudyavita umo  mwine Loma wetutuma. Ufwaninwe kwenda ku yandi njibo mu Kesalea.’ Petelo wēbatundaila, bālāla kwandi. Difuku dilonda’po, wāenda nabo ku Kesalea, pamo ne banababo bamobamo ba mu Yopa.

Konilusa pa kumona Petelo, wāmufukatyila mu manwi. Inoko Petelo wāmunena’mba: ‘Imana! Amiwa ne muntu’tu pamo’nka bwa abe. Leza waunsapwila ngiye ku yobe njibo, nansha Bayuda byokebendangapo ku mobo a Bajentaila. Shi ke pano, nombole kine kyowangityila.’

Konilusa wāsapwila Petelo amba: ‘Pano ke padi mafuku aná, ponadi nombela Leza, mwikeulu umo waunsoñanya nkwityije. Nakwisāshila, witufundije Kinenwa kya Yehova.’ Petelo wānena’mba: ‘Nayuka’mba Leza kadipo na mboloji. Witabijanga muntu ye-yense usaka kumutōta.’ Petelo wēbafundija myanda mivule ya Yesu. Penepo mushipiditu ujila wātūkila Konilusa ne boba badi nandi, abo bonso bābatyijibwa.