MuKesareya, mwadiña mukulumpi wamashidika awaRoma alemesheliwu wejina daKonelisu. Hela chakwila hadiña kaYudeyaku, aYudeya amulemesheli. Wakwashileña atuzweñi niantu akaankila chakufuma hamuchima. Konelisu wamukuhweleleli Yehova nawa walombeleña kudi yena mpinji yejima. Ifuku dimu, kañelu wamwekeni kudi Konelisu nakumuleja nindi: ‘Nzambi natiyi kulomba kweyi. Dichi temeshaku amayala kumusumba waYopa, kunakushakamayi Petulu, kulonda amutambiki enzi kudi eyi.’ Hohenohu, Konelisu watemesheli amayala asatu kuYopa, hadiña makilomita 50 kuya kukabeta kakuchidiilu.

Hadiñayi muYopa, Petulu wamweni chimwenu. Wamweni anyama ayikaanishiliwu aYudeya kuda, nawa watiyili izu dinakumuleja nawu adii. Petulu wakaanini nakuhosha nindi: ‘Ilaña kanda nideñahu dehi kanyama wamajilu muchihandilu chami.’ Izu damulejeli nawu: ‘Bayi wutena awa anyama neyi amajiluku. Nzambi nayitookeshi dehi.’ Petulu amulejeli cheñi nawu: ‘Kudi amayala asatu anemani kuchiisu cheyi. Yaña hamu nawu.’ Wayili kuchiisu nakuyihula awa amayala chuma chenjililiwu. Amwakwili nawu: ‘Anatutemeshi kudi Konelisu, mukulumpi wamashidika  awaRoma. Nakutambiki nindi wuyi kwitala dindi kuKesareya.’ Petulu wayiñijili mwitala dindi nawa dimwakaaminiwu. Chikwachili wayili nawu kuKesareya hamu nawamanakwindi amakwawu amuYopa.

Konelisu chamumweniyi hohu Petulu, wafukamini. Ilaña Petulu wamulejeli nindi: ‘Imanaku! Ninami nidi muntu hohu neyi eyi. Nzambi wanleja kwinza kwitala deyi, hela chakwila aYudeya hiyayaña mumatala awantu abula kwikala aYudeyaku. Mwani nlejenu chuma chimunantambikili.’

Konelisu wamulejeli Petulu nindi: ‘Mafuku awana anahitihu nalombaña kudi Nzambi, nawa kañelu wanlejeli nindi nukutambiki. Mwani tudizishi mazu aYehova.’ Petulu wahosheli nindi: ‘Ichi neluki nami Nzambi hakweti chaambuku. Watambwilaña muntu wejima wakeñaña kudifukula kudi yena.’ Petulu wayidizishili yuma yayivulu hadi Yesu. Kuhiñahu, spiritu yajila yenjili hadi Konelisu niantu adiñayi nawu hamu, nawa wejima wawu ayipapatishili.