Mu Kesaliya, mwali Umwina Loma umwi umucindame sana uwali umukalamba wa yasilika uwi zina lyakuti Koneli. Nanti icakuti ataali Umuyuda, Ayuda yamucindike. Waitemelwanga ukwazwilizya apiina na antu alondekwanga uwazwilizyo. Koneli wataile Yeova nupya lyonsi wapepanga kuli aliwe. Wanda umwi, malaika walolekile kuli Koneli nu kumunena ati: ‘Leza watauvwa amapepo yako. Ali cino tuma aonsi uku musumba uwa Yopa kuno Petulo akaikala kuti yakamusende.’ Papo kwene sile, Koneli watumile aonsi yatatu uku Yopa apatalimfile makilomita mupiipi na 50.

Lyene lino Petulo wali uku Yopa, waweni icilolwa. Waweni inyama zino Ayuda yatazumiliziwe ukulya, nupya uvwile umwi akumunena ukuti alye inyama zizyo. Petulo wakanyile nu kulanda ati: ‘Ntatala nalyapo inyama itasanguluka mu umi wane onsi.’ Lyene uvwile izwi likuti: ‘Utaama inyama zii ukuti zitasanguluka. Pano Leza wazisangulula.’ Nupya izwi lyatiile: ‘Pali aonsi yatatu panzi. Upite nayo.’ Petulo wafumile panzi nu kuya uzya aonsi yaya vino yalondanga. Nayo yatiile: ‘Koneli Umwina Loma, mukalamba uwa yasilika uwatatutuma. Ulinzile ukuya uku ng’anda yakwe uku  Kesaliya.’ Petulo wanenyile aonsi yaya ukuti yatale iikale nawe uku ng’anda ukwakwe. Lyene uwanda uwalondelilepo, wapisile nayo uku Kesaliya nupya na ina yamwi aa mu Yopa yamulondiile.

Lino Koneli waweni Petulo, wafukime pansi. Lyene Petulo wamunenyile ati: ‘Katuka! Nani kwene nene muntu sile. Leza wanenyile ukuti nize uku ng’anda ukwako, nanti icakuti Ayuda yatalinzile ukwingila umu ma ng’anda ya yantu aa mu mutundu uze. Fwandi neene umulandu uno watungamila.’

Koneli wanenyile Petulo ukuti: ‘Amanda 4 ku cisila napepanga kuli Leza, lyene malaika wanenyile ukuti nkwame. Twapaapata tusambilizye mazwi yakwe Yeova.’ Petulo watiile: ‘Naasambilila ukuti Leza atakwata kapaatulula. Lelo akapokelela umuntu wensi akulonda ukumupepa.’ Petulo wayasambilizye ivintu ivingi pali Yesu. Lyene umupasi wa muzilo wizile pali Koneli na yonsi yano wali nayo, nupya yonsi yabatiziwe.