Ñuu Cesarea ni̱xi̱yo iin ta̱ soldado ta̱ ñuu Roma ta̱ xi̱naní Cornelio. Ni su̱ví ta̱ Judío níxikuura, soo i̱xato̱ʼóva na̱ Judío ta̱yóʼo. Va̱ʼaní ni̱xi̱yo inira xíʼin na̱ ndáʼvi. Ta̱ Cornelio xi̱kandíxara Jehová ta ndiʼi ki̱vi̱ xi̱ka̱ʼa̱nra xíʼinra. Iin ki̱vi̱ iin ángel ki̱ta nu̱úra ta ni̱ka̱ʼa̱nra xíʼinra: “Ndióxi̱ xi̱niso̱ʼora ña̱ ni̱ka̱ʼún xíʼinra. Chindaʼá na̱ káchíñu nu̱ún ná ku̱ʼu̱nna ñuu Jope, kán íyo ta̱ Pedro, ta ná ka̱ʼa̱nna xíʼinra ña̱ kixira kotora yóʼó”. Ta̱ Cornelio kama chi̱ndaʼára u̱ni̱ ta̱a ku̱a̱ʼa̱nna chí ñuu Jope, ta ki̱ʼva 50 kilómetro ndíka̱a̱ña chí sur.

Soo tá íyo ta̱ Pedro ñuu Jope, xi̱nira iin visión. Xi̱nira kití tí va̱ása xíniñúʼu kuxu na̱ judío. Tándi̱ʼi xi̱niso̱ʼora ni̱ka̱ʼa̱nna xíʼinra ña̱ ná kuxurarí. Ta̱ Pedro kǒo níxiinra ta ni̱ka̱ʼa̱nra: “Nda̱a̱ ni iin yichi̱ kǒo xíxii̱ tí kití tí va̱ása va̱ʼa”. Ta ni̱ka̱ʼa̱nna xíʼinra: “Kǒo ka̱ʼún ña̱ va̱ása va̱ʼa tí yóʼo, chi vitin Ndióxi̱ káʼa̱nra ña̱ va̱ʼavarí”. Tasaá ni̱ka̱ʼa̱n tukuna xíʼinra: “Ki̱xa̱a̱ u̱ni̱ ta̱a chí yéʼún, kúaʼan xíʼinna”. Ta̱ Pedro xu̱nára yéʼé ta ni̱ka̱ʼa̱nra xíʼin na̱ ta̱a yóʼo nda̱chun ki̱xa̱a̱na nu̱úra. Na̱kán ni̱ka̱ʼa̱nna: “Iin ta̱ soldado ta̱ ñuu Roma ta̱ naní Cornelio chi̱ndaʼá ndi̱ʼi̱. Kúni̱ra ña̱ ku̱ʼu̱n xíʼinndi̱ veʼera ñuu Cesarea”.  Ta̱ Pedro ni̱ka̱ʼa̱nra xíʼin na̱ ta̱a yóʼo ná kindo̱ona veʼera ñu̱ú saá. Tá inka ki̱vi̱, saá ku̱a̱ʼa̱nra xíʼinna ñuu Cesarea. Ta ku̱a̱ʼa̱n sava na̱ hermano ñuu Jope xíʼinra.

Tá xi̱ni ta̱ Cornelio ki̱xa̱a̱ ta̱ Pedro, xi̱kuxítíra nu̱úra. Soo ta̱ Pedro ni̱ka̱ʼa̱nra xíʼinra: “Kundichi. Ta̱a táʼan miívaún kúi̱. Ndióxi̱ chi̱ndaʼá yi̱ʼi̱ va̱xii̱ veʼún, ni va̱ása xíniñúʼu ki̱ʼvi ndi̱ʼi̱ na̱ judío veʼe na̱ inka ñuu. Soo, vitin ka̱ʼa̱n xíʼi̱n nda̱chun ka̱naún yi̱ʼi̱ va̱xii̱ nu̱ún”.

Ta̱ Cornelio ni̱ka̱ʼa̱nra xíʼin ta̱ Pedro: “Xa̱a̱ ku̱mí ki̱vi̱ ni̱ka̱ʼi̱n xíʼin Ndióxi̱ ta iin ángel ni̱ka̱ʼa̱n xíʼin ña̱ kanai̱ yóʼó. Ta vitin sanáʼa̱ ndi̱ʼi̱ ndiʼi ña̱ káʼa̱n Jehová”. Ta̱ Pedro ni̱ka̱ʼa̱nra: “Vitin kúnda̱a̱-inii̱ ña̱ va̱ʼa ndiʼi na̱ yiví nu̱ú Ndióxi̱, ndákiʼinra ndiʼi na̱ kúni̱ ndasakáʼnu-ñaʼá”. Ku̱a̱ʼání ña̱ sa̱náʼa̱ ta̱ Pedro na̱yóʼo xa̱ʼa ta̱ Jesús. Ta̱ Cornelio xíʼin na̱ íyo xíʼinra nda̱kiʼinna espíritu santo Ndióxi̱, ta nda̱kuchina.