Ipan Cesarea itstoya se tlakatl katli kinyakanayaya soldados tlen Roma, motokaxtiyaya Cornelio. Maske amo eliyaya judío, judíos kitlepanitayayaj. Kipaktiyaya temakas tlen kipixtoya uan kinpaleuiyaya katli teikneltsitsij. Cornelio tlaneltokayaya ipan Jehová uan nochipa momaijtouayaya. Se tonali, se iluikaejketl kiitato uan kiiljuik: “ToTeotsij mitstlakakilijtok. Xikintitlani mosoldados ne Jope kampa itstok Pedro, uan ma kiiljuikaj ma mitsitaki”. Cornelio nimantsi kiniljuik eyij isoldados ma yakaj Jope, nopa altepetl mokauayaya se 50 kilómetros (30 millas) ika sur.

Ipan Jope, Pedro kiitak kejuak ipan se temiktli tlapialmej tlen judíos amo kinamikiyaya kikuasej. Teipa kiiljuijkej ma kinkua. Pedro amo kinejki uan kiijtok: “Amo kema nijkuajtok se tlapiali tlen amo kinamiki tijkuasej, tlen tikitaj kejuak sokiyo”. Teipa kiiljuijkej: “Amo xikijto sokiyo tlen toTeotsij kipajpaktok”. Nojkia kiiljuijkej: “Mokalteno itstokej eyij tlakamej, xikinitati”. Pedro kiski uan kintlajtlanilik kenke kitemouayayaj. Inijuantij kinankilijkej: “Techualtitlanki Cornelio, se katli kinyakana soldados tlen Roma. Kineki ma timitsuikakaj ichaj”. Pedro kiniljuik nopa  tlakamej ma mokauakaj ichaj nopa youali. Ualmostla, yajki ininuaya ne Cesarea. Sekij toikniuaj katli euayayaj Jope nojkia yajkej.

Kema Pedro asito, Cornelio motlankuaketski iixpa. Pedro kiiljuik: “Ximoketsa. Na nojkia san ni maseuali kej ta. ToTeotsij nechiljuik ma niuala mochaj, maske judíos amo tikalakij ininchaj katli amo judíos. Nama, xinechiljui kenke tinechnotski”.

Cornelio kiiljuik Pedro: “Kipia naui tonali nimomaijtouayaya, uan se iluikaejketl nechiljuik ma nimitsnotsati. Yeka nimitstlajtlania, xitechmachti tlen Jehová kineki ma tijmatikaj”. Pedro kiiljuik: “Nama nijmati toTeotsij amo techikoita, ya kinselia nochi maseualmej katli kinekij kiueyichiuasej”. Pedro kinmachtik miak tlamantli tlen Jesús. Teipa, Cornelio uan nochi katli itstoyaj ipan ichaj kiselijkej toTeotsij itonal, uan moatsonpoliuiltijkej.