Itech altepetl Cesarea, okatka se tlakatl tlen omotokayotiaya Cornelio, ye okinyekanaya soldados romanos. Maski ye amo okatka judío, akinmej okatkaj judíos okitlakaitayaj. Cornelio okipaktiaya kinpaleuis akinmej amo itlaj okipiayaj. Ye otlaneltokaya itech Jehová uan nochipa okitlatlaujtiaya. Se tonal, se ángel okimonextili uan okilui: “ToTajtsin Dios okinkak motlatlaujtiluan. Xikinmilui motlakeualuan ma yakan altepetl Jope, ompa kajki Pedro uan ma kiluikan ma mitsitaki”. Cornelio san niman okintitlanki eyi tlakamej altepetl Jope tlen omokauaya kanaj 50 kilómetros ik sur.

Itech altepetl Jope, itlaj okinextilijkej Pedro. Ye okinmitak yolkamej tlen judíos amo kuali kikuaskiaj. Satepan okikak se tlajtoli uan okilui ma tlakua. Pedro amo okinek uan okijto: “Amo keman nikua se yolkatl tlen amo chipauak”. Tlajtoli okilui: “Amo xikijto ninmej yolkamej amo chipauakej, axkan toTajtsin Dios kijtoa chipauakej”. Tlajtoli noijki okilui: “Eyi tlakamej katej mokaltempa, xikinmitati”. Pedro okinmitato uan okintlajtlani tleka okitatoj. Yejuan okiluijkej: “Cornelio otechualtitlanki. Ye kinyekana soldados romanos. Kineki touan xiuiki  ichan tlen kajki Cesarea”. Pedro okinmilui nonmej tlakamej ma mokauakan ichan non yoak. Mostlatika, Pedro inmiuan oyajki altepetl Cesarea. Noijki oyajkej sekimej tokniuan tlen ochantiayaj Jope.

Cornelio omotlankuaketski ijkuak okitak Pedro. Pero Pedro okilui: “Ximoketsa. Ne noijki nitlakatl ken te. ToTajtsin Dios onechilui ma niuiki mochan, maski akinmej tijudíos amo tikalakij inchan akinmej amo judíos. Nimitstlatlaujtia, xinechilui tleka otinechnotski”.

Cornelio okilui Pedro: “Yikipia naui tonal oniktlatlaujtijtoka toTajtsin Dios uan se ángel onechilui ma nimitsnotsa. Nimitstlatlaujtia, xitechmachti tlen kijtoa Jehová”. Pedro okinankili: “Axkan kuali nikmati toTajtsin Dios amo techikoita, ye kinselia nochtin akinmej kinekij kiueyichiuaskej”. Pedro okinmachti miak tlamantli itech Jesús. Ijkuakon, Cornelio uan akinmej ompa okatkaj okiselijkej espíritu santo uan omoapolaktijkej.