Ku dhorobha ro Sezareya, kwainga no umwe mutungamiriri wo masoca o ciRoma waidaninjwa Kornerio. Pikija kuti iyena aacaingepi muJudha, vaJudha vaimureremeja maningi. Iyena waibesera varombo. Kornerio waitenda kuna Jehovha zve waita mukumbiro kwaari mukuvo wese. Njiku imweni, ngirozi imweni yakabudirira kuna Kornerio, yoti: ‘Mwari wazwa mukumbiro jako. Wari tumirai mwanarume kuti aende ku dhorobha ro Jope, kunogara Pedro zve mubvunjei kuti aviye naye.’ Ngo kukasika, Kornerio wakatumira vandhu vatatu kwenda Jope, kwainga no makiromita anokwana kuita 30.

Pavainga vecienda ku Jope, Pedru wakava no civoniso. Iyena wakavona zvinyama zvokuti vaJudha avacaitendehwa kuha, pondhopo wakazwa izwi raaimubvunja kuti ahe. Pedru wakaramba, eciti: ‘Andito ndikaha ciri cese cakarambiswa no cakangora mu upenyu hwangu.’ Perapo izwi rakamubvunja kuti: ‘Ucadaninja zvinyama izvi kuti zvakangora. Mwari wazvicenesa.’ Pedru wakabvunjwazve kuti: ‘Kuno vandhu vatatu pa musuvo wako. Endai navo.’ Pedru wakaenda pa musuvo zve wakabvunjisa vanarumevo kuti ngenyi vainga pondhopo. Ivona vakapingura kuti: ‘Itusu tatumwa ndi Kornerio, mukuru wo masoca o ciRoma. Ari kuda kuti uende ku nyumba  yake ku Sezareya.’ Pedru wakakoka vanarume vondhovo kuti vave varendo vake usiku wondhowo. Pa njiku yakatevera, wakaenda na ivona ku Sezareya, pomwe no hama jimweni jo Jope.

Kornerio paakavona Pedru, wakagwadama. Asi Pedru wakananga kuti: ‘Mukai! Ndiri mwanarume inga iwewe. Mwari wandibvunja kuti ndiviye mu nyumba mwako, pikija kuti maJudha aatendehwi kunghwina mu nyumba yo voNyikanja. Waro ndibvunjei zvawandidanira.’

Kornerio wakabvunja Pedru kuti: ‘Pandainga deciita mukumbiro mazuva marongomuna apinda, imwe ngirozi yakandibvunja kuti ndimudanije. Ndapota tijijisenyi masoko a Jehovha.’ Pedru wakati: ‘Ndazviziva kuti Mwari aasani mundhu. Iyena anotendera ariwese anoda kumunamata.’ Pedru wakavajijisa zviro zvakawanda ngo pamusoro pa Jesu. Perapo Kornerio no vaya vaengaro pondhopo vakaashira mujimu mucena zve vakabhabhatijwa.