Go be go na le monna yo mongwe wa Moroma kua Kesarea yoo leina la gagwe e bego e le Koronelio. Monna yoo o be a na le maemo e bile a laola mašole a mantši. Le ge e be e se Mojuda, Bajuda ba be ba mo rata. O be a thuša badiidi le batho ba bangwe. Koronelio o be a na le tumelo go Jehofa e bile a mo rapela ka mehla. Ka letšatši le lengwe, morongwa o ile a tšwelela go Koronelio gomme a re: ‘Modimo o kwele dithapelo tša gago. Bjale roma banna gore ba ye motseng wa Jopa, ntlong yeo Petro a dulago go yona, gomme ba mmotše gore a tle go wena.’ Ka yona nako yeo, Koronelio a roma banna ba bararo gore ba ye Jopa, e lego leeto la dikhilomithara tše e ka bago tše 50 ka borwa bja Kesarea.

Ka yona nako yeo, Jehofa o be a bolela le Petro a diriša pono. Jehofa o ile a bontšha Petro diphoofolo tšeo Bajuda ba bego ba sa swanela go di ja, gomme Petro a kwa lentšu le mmotša gore a je diphoofolo tšeo. Eupša Petro o ile a gana go di ja, gomme a re: ‘Aowa, le ka mohla ga sa nka ka ja phoofolo e šilafetšego.’ Ke moka lentšu leo la re go yena: ‘O se ke wa re diphoofolo tše di šilafetše. Modimo o di hlwekišitše.’ Lentšu leo le ile la botša Petro gape la re: ‘Go na le banna ba bararo kua mojakong. O sepele le bona.’ Ke moka Petro a ya go bona gomme a ba botšiša gore ba nyaka eng. Banna bao ba re: ‘Re romilwe ke Koronelio, molaodi wa mašole. O re etla ntlong ya gagwe kua Kesarea.’ Petro o ile a kgopela  banna bao gore ba robale moo a bego a dula gona. Letšatšing le le latelago, o ile a ya le banna bao Kesarea, e bile a sepela le ba bangwe ba barutiwa ba gona moo Jopa.

Ge Petro a tsena ntlong ya Koronelio, Koronelio o ile a kotama ka matolo a mo khunamela. Eupša Petro a re: ‘Emelela, le nna ke fo ba motho go swana le wena. Modimo o mpoditše gore ke tle ntlong ya gago, gaešita le ge Bajuda ba sa swanela go tsena ka dintlong tša batho bao e sego Bajuda. Hle, mpotše seo o mpileditšego sona.’

Koronelio a re go Petro: ‘Matšatšing a mane a fetilego ke ile ka rapela Modimo, gomme morongwa a mpotša gore ke rome batho gore ba tle ba go bitše. Hle, re rute ka Jehofa le ka Jesu.’ Petro a re: ‘Bjale gona ke a bona gore Modimo ga a kgetholle batho. O amogela motho le ge e le ofe yo a nyakago go mo hlankela.’ Petro o ile a ruta Koronelio le batho bao a bego a na le bona dilo tše dintši ka Jesu. Ge a dutše a ba ruta, Jehofa o ile a nea Koronelio le batho bao a bego a na le bona moya o mokgethwa, gomme ka moka ga bona ba kolobetšwa.