Mepunda-umbo lio Sesaleia, ankho mukala efualali limwe lio Roma liankhimana litiwa o Korneliu. Namphila ankho ha mu Judeu, mahi ova Judeu ankho vena onthilo nae. Ankho ukuatesako vokuahepa novanthu ovakuavo vesukisa okukuatesuako. Korneliu ankho una ekolelo mu Jeova iya ankho apeho ulikuambela ku Huku. Nthiki imwe, oandyu imwe aimonekela Korneliu iya aimupopila okuti: ‘Huku watehelela omalikuambelo ove. Pahe tuma ovanthu vaye kepunda-umbo lio Jope, oku kuna Petulu iya omuiti eye kuove.’ Liwa-liwa, Korneliu atumu ovalume vetatu ko Jope ankho paendwa onokilometulu 30 okueenda no kombuelo.

Mahi puetyi Petulu ekahi ko Jope, wamuene emonekelo limwe. Wamona ovinyama ankho ova Judeu vahapondola okulia iya eivi ondaka yemupopila opo alie ovinyama ovio. Petulu aanye iya ati: ‘Mahi ame nalumwe nalile ovinyama viasila.’ Ondaka aimupopila okuti: ‘Uhaihane ovinyama ovio okuti viasila. Huku wevisukukisa.’ Petulu tupu apopilwa okuti: ‘Pombundi yove pena ovalume vetatu. Enda navo.’ Petulu avasi ovalume ovo pombundi evepulu oityi veya okulinga. Ovalume ovo avakumbulula okuti: ‘Onthue tuatumwa na Korneliu, omutumini womafualali o ko Roma. Enda mukelivase nae keumbo liae ko Sesaleia.’  Petulu apopila ovalume ovo opo valale meumbo omo. Muhuka tyee, aende navo ko Sesaleia, kumwe novakuatate ovakuavo vatunda ko Jope.

Etyi Korneliu amona Petulu, emuhatekela iya aikila konongolo. Mahi Petulu emupopila okuti: ‘Katuka! Ame ndyimunthu vala ngove. Huku wamphopila opo ndyiye peumbo liove, namphila ova Judeu kaveliende na vana vehe va Judeu. Pahe, mphopile omokonda yatyi watumina okundyihana?’

Korneliu apopila Petulu okuti: ‘Mononthiki ononkhuana mbokualamba, ame ankho ndyikahi nokulikuambela ku Huku iya oandyu imwe aimphopila opo ove uye kuno. Mbambavo tulongese ondaka ya Jeova.’ Petulu apopi okuti: ‘Pahe nanoñgonoka okuti Huku utupu okapungulula. Utavela kese omunthu una onthilo nae.’ Petulu evelongesa ovipuka ovinyingi konthele ya Jesus. Ngotyo, ospilitu sandu ailaukila Korneliu novanthu ovakuavo ankho vekahi kumwe nae iya aveho avambatisalwa.