Diad Cesarea, walay opisyal na saray sundalo na Roma ya say ngaran to et Cornelio. Anggano aliwan Judio si Cornelio, sikatoy rerespetoen na saray Judio. Maiter tan matulong si Cornelio ed saray mairap-bilay tan pakaskasi. Manisia si Cornelio ed si Jehova tan lanang ya manpipikasi ed sikato. Aminsan, walay anghel ya nampanengneng ed si Cornelio tan imbaga to: ‘Dinengel na Dios iray pikakasim. Mangibaki ka natan na lalaki ya onlad syudad na Joppe, tan patawag moy Pedro, ta diman so panaayaman to.’ Tampol ya angibaki si Cornelio na lalaki ya onlad Joppe ya manga 50 ya kilometro so kaarawi tod Cesarea.

Diman ed Joppe, walay anengneng nen Pedro ya pasingawey. Akanengneng ditan na ayayep ya agnayarin kanen na saray Judio, tan walay arengel ton boses ya angibagad sikato ya kanen to iratan. Balet imbaga nen Pedro: ‘Agko labay, ta agak nin balot angan na ayep ya aliwan malinis.’ Insan imbaga na boses ed sikato: ‘Agmo ibabaga ya aliwan malinis irayan ayayep. Imbaga na Dios ya malinis la iratan.’ Insan wala met so angibagad si Pedro: ‘Walay taloran lalaki diad puerta ya manaanap ed sika. Mila kad sikara.’ Linmay Pedro ed puerta tan tinepet tod saray lalaki no akin ya aanapen da. Imbaga da: ‘Imbaki kami nen Cornelio, ya opisyal na saray sundalo na Roma. Papaonlaen to kad abung to diad Cesarea.’ Pinatuloy nen Pedro imay taloran lalaki tan  pinaugip to ni ra ed panaayaman to diad saman ya labi. Kaimbuasan to, akila si Pedro ed sikara paonlad Cesarea, tan angipila na arum ya agagi ya tagad Joppe.

Nen anengneng nen Cornelio si Pedro, tinmalimukor ed arapan nen Pedro. Balet imbaga nen Pedro: ‘Alagey ka! Too ak labat ya singa sika. Imbaga na Dios ed siak ya onla ak ed abung mo, anggano agnayarin onla iray Judio ed abung na saray aliwan Judio. Ibagam ed siak sirin no akin ya impatawag mo ak.’

Imbaga nen Cornelio ed si Pedro: ‘Apatiran agew lay apalabas, manpipikasi ak ed Dios, tan walay anghel ya imbaga ton patawag ta ka. Ibangat mo komon ed sikami iray salita nen Jehova.’ Imbaga nen Pedro: ‘Natan amtak la ya anggapoy toon ipuepuera na Dios. Aawaten to so anggan siopa ya labay toy mandayew ed sikato.’ Dakel so imbangat ed sikara nen Pedro tungkol ed si Jesus. Insan akaawat na masanton espiritu si Cornelio pati saramay wadman ed abung to, insan nampabautismo iran amin.