Cesarea llajtapeqa romanospa soldadosninpa capitannin Cornelio tiyakorqa. Paytaqa mana judío kajtinpis, judíos respetaj kanku. Payqa wajchasmanta, waj runasmantapis mayta khuyakoj. Jehová Diospipis creej, orakullajpunitaj. Uj día, payman uj ángel rikhurispa nerqa: “Diosqa mañakusqaykita uyarin. Kunantaj Jope llajtaman runasta kachay, Pedrota wajyamunankupaj”, nispa. Cornelioqa usqhayllata kinsa kamachisninta Jopeman kacharqa, chaytaj 50 kilometrospi jina kasharqa, sur ladopi.

Chaykamataj Jope llajtapi Pedroqa mosqoypi jina rikorqa judíos mana mikhojchu kanku chay animalesta. Chantá uj ángel nerqa: “Mikhuy”, nispa. Pedrotaj nerqa: “Ni jaykʼaj mikhorqanichu chʼichipaj qhawasqa animaltaqa”, nispa. Angeltaj nerqa: “Diospa llimphuchasqan animalestaqa, amaña chʼichi niychu. Kunanqa kinsa runas maskʼashasunku, paykunawan rillay”, nispa. Pedrotaj uraykuspa chay runasta nerqa: “¿Imamantaj jamunkichejri?”, nispa. Paykunataj nerqanku: “Soldadospa capitannin Cornelio kachamuwayku, Cesareapi wasinman noqaykuwan rinaykipaj”, nispa.  Pedrotaj paykunata chay chʼisi quedacherqa. Qʼayantintaj paykunawan Cesareaman rerqa. Jopemanta wakin hermanospis rillarqankutaj.

Cornelioqa Pedrota rikuspa qonqorikorqa. Pedrotaj nerqa: “Sayariy, noqapis qan jina runallataj kani. Judiosqa waj llajtayoj runaj wasinman mana yaykuykuchu, jinapis Dios wasiykiman kachamuwan. Willariway imapajchus wajyachiwasqaykita”, nispa.

Corneliotaj nerqa: “Tawa pʼunchayña kashan orakusqaymanta, uj angeltaj niwarqa wajyachimusunayta. Kunanqa Jehová Diospa nisqasninta yachachiwayku ari”, nispa. Pedrotaj nerqa: “Kunanqa allinta reparani, Diosqa tukuyta uj rejllata qhawasqanta. Payqa allinpaj qhawan payta yupaychayta munajkunata”, nispa. Pedroqa Jesusmanta tukuy imata yachacherqa. Cornelio, wasinpi kajkuna imataj Diospa atiyninta japʼispa bautizakorqanku.