Pa Cesarea kʼo jun kinimal ri soldados re Roma ri ubʼiʼ are Cornelio. Pa neʼ are ta judío, ri e judíos sibʼalaj nim kkilo. Are jun achi kuya sipanik, rumal che ubʼanom kʼi utz taq jastaq chke ri mebʼayibʼ. Cornelio kkojon chrij ri Jehová xuqujeʼ amaqʼel kubʼan uchʼawem che. Pa jun qʼij, jun ángel xukʼut ribʼ chuwach xuqujeʼ xubʼij che: «Ri Dios utatabʼem ri achʼawem. Chataqaʼ bʼi ri achijabʼ che e kʼo awukʼ pa ri tinamit re Jope, jachiʼ kʼo wi ri Pedro, rech kkibʼij che kpe che awilik». Cornelio chanim xeʼutaq bʼi oxibʼ achijabʼ pa Jope, che kʼo pa 50 kilómetros (30 millas) che ri sur.

Tekʼuriʼ, pa Jope, Pedro xubʼan jun achikʼ. Xeril awajibʼ che ri e judíos kekun taj kekitijo. Tekʼuriʼ xuta jun chʼabʼal che xubʼij che: «Cheʼatijaʼ». Ri Pedro xraj taj xuqujeʼ xubʼij: «Kʼo ta jumul nutijom awajibʼ che e chʼajchʼoj taj». Ri chʼabʼal xubʼij: «Kabʼij taj che ri awajibʼ riʼ che e chʼajchʼoj taj, kimik ri Dios kubʼij che e chʼajchʼoj». Ri chʼabʼal xuqujeʼ xubʼij: «Kʼo oxibʼ achijabʼ chuchiʼ ri awachoch, jat kukʼ». Pedro xbʼe chuchiʼ ri rachoch xuqujeʼ xutaʼ chke ri achijabʼ ri kitajkil. E are xkibʼij: «Xojutaq lo Cornelio, jun kinimal ri soldado re Roma. Kraj che katpe qukʼ pa ri rachoch pa Cesarea». Pedro xubʼij chke ri achijabʼ che kekʼojiʼ kan pa ri  rachoch pa ri chaqʼabʼ riʼ. Chukabʼ qʼij, xbʼe kukʼ pa Cesarea. Jujun qachalal re ri tinamit re Jope xuqujeʼ xebʼe rukʼ.

Are chiʼ Cornelio xrilo che xopan ri Pedro, xxukiʼ chuwach. Are kʼu ri Pedro xubʼij che: «Chatwalijoq. In winaq junam awukʼ at. Ri Dios xubʼij chwe che kinpe cho ri awachoch, pa neʼ ri e judíos keʼok ta pa ri e kachoch ri e winaq re nikʼaj chi tinamit, o winaq che e judios taj. Chanim riʼ, chabʼanaʼ jun toqʼobʼ, chabʼij chwe jasche xataq nukʼamik».

Cornelio xutzijoj che ri Pedro: «Qʼaxinaq chiʼ kajibʼ qʼij tajin kinbʼan nuchʼawem che ri Dios, xuqujeʼ jun ángel xubʼij chwe che kinbʼe che asikʼixik. Chabʼanaʼ jun toqʼobʼ, chatzijoj ri jastaq che kubʼij ri Jehová». Pedro xubʼij: «Kimik qas kinchʼobʼo che ri Dios jalan ta keril wi ri winaq, areʼ keʼukʼam konojel ri kkaj kkiqʼijilaj». Pedro xutzijoj kʼi jastaq chrij ri Jesús. Tekʼuriʼ, Cornelio xuqujeʼ ri e kʼo rukʼ pa ri rachoch xkikʼam ri uxlabʼixel, xuqujeʼ xkibʼan ri kiqasanjaʼ.