Cesarëa markachömi Corneliu jutiyoq nuna täraq. Pëqa tröpa mandaqmi karqan. Y mana judïu kaptimpis, judïukunaqa alläpam respetayaq. Pëqa alli nuna karmi waktsakunata tukïnöpa yanapaq. Y Jehoväman creikurmi pëman imëpis mañakoq. Juk kutim juk angel yuripurir kënö nirqan: “Mañakïnikitam Dios wiyashqa. Pëdruta ashiyämunampaq y pushayämunampaq Jöpi markaman sirwishoqnikikunata kachë”. Tsënam Corneliuqa, ura lädupa 50 kilömetruchö këkaq Jöpi markaman kima (kimsa) sirweqninkunata kacharqan.

Pëdruqa Jöpichömi këkarqan, y juk visionchömi judïukuna mana mikuyanqan animalkunata rikärirqan. Y “tsëkunata mikï” neqtam wiyarqan. Peru Pëdruqa manam mikïta munarqantsu. Antis, “kë melanëpaq animalkunataqa manam ni imëpis mikushqatsu kä” nirqanmi. Tsënam, “ama nitsu kë animalkunaqa melanëpaq kayanqanta, porqui Diosqa limpiu kayanqantam nin” nishpa contestarqan. Nïkurmi, “kimaq nunakunam punkïkichö këkäyan. Atiendirir pëkunawan ëwë” nirqan. Tsënam Pëdruqa punkuman yarqurir, imaq ëwayanqanta tsë nunakunata tapurirqan. Pëkunanam,“tröpa mandaq Cornelium kachayämashqa. Y Cesarëa markachö këkaq wayinman ëwanantsiktam munan” niyarqan.  Tsënam Pëdruqa tsë nunakunata tsë paqas posadatsirqan. Y waränin junaqqa pëkunawanmi Cesarëa markata ëwarqan. Jina Jöpipita juk ishkë wawqikunam yanaqäyarqan.

Pëdru chäriptinqa, Corneliuqa puntanmanmi qonqurikïkurqan. Peru Pëdruqa kënömi nirqan: “Sharkï. Noqapis qamnö nunallam kä. Judïu karnin juk nacion nunakunapa wayinkunaman yëkïta mana puëdirpis, Dios mandamaptinmi wayikiman shamurqö. Willarallämë imanir qayatsimanqëkita”.

Tsënam Corneliuqa Pëdruta kënö willarqan: “Chusku junaqnam pasarishqa Diospa angelnin yuripumanqampita. Pë nimaptinmi qayatsimurqoq Jehovä ninqanta yachatsiyämänëkipaq”. Pëdrunam kënö nirqan: “Kananmi cuentata qokurï Diosqa llapan nunakunatapis igualpa rikanqanta, y adorëta munaq kaqtaqa pï kaptimpis chaskinqanta”. Nïkurmi Jesuspita imëkata yachatsirqan. Tsënam Corneliu y tsëchö këkaqkuna santu espïrituta chaskirir bautizakuriyarqan.