Cesarea llajtapica soldadocunata mandaj Cornelio runami causarca. Paica Yaya Diostaca punllantami mañaj carca. Huajchacunatapish ayudajmi carca. Chaimantami pai mana judío cajpipish judiocunaca respetajcuna carca. Shuj punllaca Diospaj ángel ricurishpami, ‘can mañashcacunataca Diosca uyashcami. Cunanca Jope pueblomanta Pedrota pushamuchun cambaj runacunata cachai’ nirca. Chaita uyashpami chai rato quimsa runacunata cacharca. Chaiman chayangapajca ura ladota rishpa 50 kilometrocunatami purina carcacuna.

Jope pueblopi cashpaca Pedroca muscuipi shinami judiocuna mana micuna animalcunata ricurca. Qꞌuipaca chaita micui nishcami uyarirca. Pedroca, ‘mapa animalcunataca nunca mana micushcanichu’ nishpami mana micusha nirca. Shinapish chai rimajca, ‘Taita Dios chuyayachishcataca canca ama mapa nichu’ nircami. Qꞌuipaca, ‘cantaca quimsa runacunami mashcacun, paicunahuan rilla’ nishcapishmi uyarirca. Chaimi Pedroca pungucama rishpa chai quimsa runacunataca imapaj shamushcata tapurca. Chashna tapujpimi paicunaca,  ‘soldadocunata mandaj Corneliomi cacharca. Paica can paipaj huasiman shamuchun ninmi’ nirca. Chai tutaca chai runacunaca Pedrohuanmi saquirircacuna. Cayandij punllaca Pedroca Jope pueblomanta huaquin huauquicunandijmi Cesareaman rircacuna.

Pedro chayajpica Cornelioca paipaj ñaupajpimi cungurirca. Chaipimi Pedroca, ‘jatari, ñucapish can shinallataj runallami cani. Judiocunapuralla apanacujpipish Diosmi cambaj huasiman ñucata cacharca. Cunanca ñucataca imapaj cayashcata huillahuai’ nirca.

Cornelioca Pedromanca, ‘chuscu punllacuna huashamanmi Diosta mañacurcani. Chaipimi shuj ángel ricurishpa canta cayachun mañarca. Cunanca ñucanchijman Jehová Dios imalla nishcata huillahuai’ nircami. Shina nijpimi Pedroca, ‘pi cashpapish Taita Diosta adorajpica paica tucuicunata chasquijtami cunantajca yachani’ nirca. Shinallataj paica Jesusmantapish ashtahuanmi yachachirca. Qꞌuipaca Corneliopish chaipi cajcunapish Diospaj espirituta chasquishpami bautizarircacuna.