Roma tropakunapa jefen Corneliom Cesarea llaqtapi yacharqa. Paytaqa judiokunapas respetaqkum llaqtamasinku mana kachkaptinpas. Cornelioqa wakchakunatapas yanapaqmi, Jehova Diostapas sapa kutim mañakuq. Huk punchawmi chayna mañakuchkaptin Diospa angelnin rikuriykuspan nirqa: “Mañakusqaykikunatam Dios uyariykun. Runaykikunata Jope llaqtaman kachaspayá Pedrota qayachimuy”, nispa. Cornelioqa chayllam kimsa runankunata kacharqa.

Chay kutillapitaqmi Pedroqa, musquyninpi hina qawachkarqa judiokunapa mana mikunanku animalkunata. Chaypim uyarirqa “chayta nakaspayki mikuy” niqta. Pedroñataqmi nirqa: “Manam haykapipas millakuypaq animalkunataqa mikurqanichu”, nispa. Hinaptinñataqmi nimurqa: “Amaña millakuypaq niyñachu, Jehova Diospaqqa manañam millakuypaqñachu”, nispa. Pedroqa uyarirqataqmi: “Wasiki punkumantam kimsa runakuna qayamuchkasunki, paykunawanyá riy”, niqtapas. Chay runakunam Pedrota nirqaku: “Roma tropakunapa jefen Corneliom qayachkasunki. Cesarea llaqtapi wasinmansi rinki”, nispa. Pedroqa paqarinnintinmi chay runakunawan hinaspa wakin iñiqmasinkunawan rirqa.

 Wasinman Pedro chayaruptinmi Cornelioqa qunqurakuykurqa. Pedroñataqmi nirqa: “¡Sayariy! Ñuqapas qam hina runallam kani. Diosmi kachamuwarqa wasikiman hamunaypaq mana judio kachkaptikipas. Chaynaqa niykuwayá imapaq qayachimuwasqaykimanta”, nispa.

Corneliom Pedrota nirqa: “Tawa punchaw ñawpaqtaraqmi Diosta mañakuchkaptiy huk angel niwarqa qayachimunaypaq. Jehova Diosmantayá yachaykachillawayku”, nispa. Pedroñataqmi nirqa: “Kunanqa yacharuniñam Diosqa pimanpas mana sayapakuq kasqanta. Diosqa chaskinmi payta yupaychay munaqkunataqa”, nispa. Hinaspam Pedroqa Jesusmanta sumaqta yachaykachirqa. Chayna yachachichkaptinmi Corneliowan chaypi kaqkunaqa chuya espirituta chaskirqaku, hinaspam bautizachikurqaku.