Cesarea llaqtapin Cornelio tiyaran, payqa Roma ejercitopin capitán karan. Manaña judiochu karan chaypas, judiokunan respetaqku. Payqa sumaq sonqon karan yanaparanmi wajchakunata, iñiranmi Diospi, sapa kutillataq paymantaqa mañakuq. Juj p’unchaymi juj ángel payman rijurispa niran: “Diosmi uyarisunki. Runakunata kachay Jope llaqtaman Pedroq alojakusqan wasiman, valekuytaq jamunanpaq”, nispa. Kaqpachan Cornelioqa kinsa runata Jope llaqtaman kacharan, chayqa uray ladopi 50 kilometropi jinan tarikuran.

Chaykaman Pedroqa Jope llaqtapi juj rijuriypi rikuran judiokunapaq jark’asqa mijunata. Juj kunkataq kamachiran mijunanpaq, paytaq mana munaranchu, niranmi: “Manan jayk’aqpas qhelli animaltaqa mijuranichu”, nispa. Jinan nimuran: “Ama qhelli niychu Diospa ch’uyanchasqan animalkunataqa”, nispa. Nillarantaqmi: “Kinsa runakunan punkuykipi kashanku, paykunawan riy”, nispa. Jinan runakunata tapuran imapaqchus jamusqankuta. Paykunataq niranku: “Roma ejercitopi capitán Cornelion kachamuwanku, munanmi noqaykuwan Cesareaman rinaykita”, nispa. Pedrotaq chay runakunata chay tuta alojaran.  Tutamantanmi Cesareaman riranku Jopemanta wakin cristianokunawan ima.

Cornelioq wasinman Pedro jaykuqtinmi Cornelioqa qonqorikuran. Pedron ichaqa niran: “Sayariy, noqaqa qan jina runallan kani. Judiokunaqa manaña jaykunkuchu mana judiokunaq wasinman chaypas, Diosmi kachamuwan wasiykiman. Chhaynaqa willaway imapaq wajachimuwasqaykita”, nispa.

Chaymi Cornelioqa niran: “Tawa p’unchay ñaupaqtan Diosmanta mañakusharani, jinan juj ángel niwaran qanta wajachimunaypaq. Chhaynaqa yachachiwayku”, nispa. Pedrotaq niran: “Kunanraqmi allinta entiendeni Diosqa lliutapas igual-llata rikusqanta”, nispa. Jinan Pedroqa Jesusmanta yachachiran. Chay ratopitaq Corneliopas wasinpi kaq runakunapas santo espirituta chaskiranku jinaspa bautizakuranku.