Cesarea llactapica romano soldadocunata mandaj Corneliomi causarca. Na judío cajpipash judiocunaca paitaca respetanmi carca. Paica siempremi pobre gentecunataca imagutapash carashpa ayudan carca. Cornelioca Jehová Diospi crishpami, paita siempre mañan carca. Shuj punllaca shuj ángel ricurishpami Corneliotaca nirca: Can mañajushcataca Diosca uyashcami. ‘Cunanga, Pedrota pushamuchun, Jope puebloman runacunata cachai’ nishpa. Chai ratomi Cornelioca quimsa jaricunata Jope puebloman cacharca. Chaiman chayangapaca casi 50 kilometrocunatami rina carca.

Chaicamanga Pedroca Jope pueblopica shuj muscuipi shinami, judiocuna na micuna animalcunata ricurca. Chaimi Pedroca jahua pachamanda cashna nijta uyarca: ‘Jatarishpa caicunata huañuchishpa micuilla’ nishcata. Pedroca na micungapaj munashpami nirca: Cai na micuna animalcunataca nunca na micushcanichu nishpa. Shina nijpimi cashna nijta uyarca: “Taita Dios micunalla nishcataca, canga ama yangapi churaichu” nishcata. Cutinmi cashna uyarirca: ‘Quimsa runacunami candaca mascanajun. Jatarishpa’ paicunahuan rilla nishpa. Chaimi Pedroca canllaman llujshishpa tapurca, imapata shamupashcanguichi nishpa. Chai jaricunaca nircami: “Soldadocunata mandaj Cornelio cachamujpimi shamupanchi”. Cornelioca Cesarea llactapi paipa huasiman shamuchun nipanmi nishpa. Chaimi chai tutaca Pedroca paicunata chaipi mingachirca. Cayandi punllaca  Jope pueblomanda huaquin huauquicunandimi Pedroca Cesarea llactaman chai runacunahuan rirca.

Pedro ña chayamujta ricushpaca Cornelioca paipa ñaupajpimi cungurirca. Chaimi Pedroca nirca: “Shayari, ñucapash canshnallata runallami cani”. Na judío cajcunapa huasiman na yaicuna cajpipash Taita Diosmi canba huasiman shamuchun nirca. Cunanga nihuai, ¿imapata cayahuarcangui? nishpa.

Chaimi Cornelioca Pedromanga nirca: ‘Cunanshna chishipimi Diosta mañajurcani’. Shina tiajujpimi, shuj ángel ricurishpa canda cayachun mandahuarca. ‘Chaica, ña chuscu punllami tucupan’. Ama shinagu cashpa Jehovamanda ñucanchiman yachachihuai nishpa. Chaimi Pedroca nirca: “Taita Diosca, na pitapash ñavita ricushpalla chasquinllu. Chaitaca, cunanga alipachami yachani. Maijan llactapi cashpapash, paita manllashpa, imatapash cashcatapacha rurajtami, Diosca alicachin” nishpa. Shinami Pedroca ashtacata Jesusmanda yachachirca. Chaimi Corneliopash, chaipi cajcunapash Diospa espíritu santota chasquishpa bautizarirca.