Ki Cezareja živinela sine jekh rimsko voeno zapovedniko so vikinela pe sine Kornelij. Iako na sine Evrei, o Evreija poštujnena le sine. O Kornelij but pomožinela sine e čorolenge. Ov verujnela sine ko Jehova hem redovno molinela pe sine leske. Jekh dive, e Kornelijaske pojavingja pe jekh angeli hem vakergja leske: „O Devel šungja tle molitve. Adaleske, bičhal manušen ki diz Jopa, kote soj o Petar, hem vaker leske te avel ki tute“. O Kornelij odma bičhalgja trine dženen ki Jopa, koja sine okolu 50 kilometrija južno tari Cezareja.

Bašo adava vreme, e Petare sine vizija. Ov dikhlja životne so o Evreija na smejnena sine te han len, hem šungja glaso so vakergja leske te hal adala životne. O Petar vakergja: „Ama me nikogaš ko životo na haljum životne so nane čista“. O glaso vakergja leske: „Ma vaker kaj akala životne nane čista, soske o Devel kergja len čista“. Isto agjaar, e Petareske sine vakerdo: „Anglo tlo udar isi trin manuša. Dža lencar“. O Petar gelo ko manuša hem pučlja len soske ale. Ola odgovoringje leske: „Bičhalgja amen o Kornelij, o rimsko voeno zapovedniko. Vakergja te ave amencar ki Cezareja“. O Petar vikingja e manušen adaja rat  te ačhoven ki leste. O javer dive, ov gelo lencar ki Cezareja, hem zaedno lencar gele nesave phralja tari Jopa.

Keda o Kornelij dikhlja e Petare, pelo angli leste ko kočaka. Ama, o Petar vakergja: „Ušti! Me da sium samo manuš. O Devel vakergja mange te avav ko to kher, iako o Evreija na džana ko manuša taro javera nacie. Akana molinava tut, vaker mange soske vikingjan man“.

O Kornelij vakergja e Petareske: „Angleder štar dive molingjum man e Devleske, hem tegani jekh angeli vakergja mange te bičhalav nekas te vikinen tut. Molinava tut sikav amen bašo Jehova“. O Petar phengja: „Akana haliljum kaj o Devel na odvojnela e manušen. Ov prifatinela sekole manuše so mangela te služinel leske“. O Petar sikavgja len but bukja bašo Isus. Tegani o Kornelij hem o manuša so sine lea dobingje sveti duh hem krstingje pe.