Ki Cezareja hine jekh rimsko vojno zapovednik kova vičindža pe Kornelije. Iako ov na hine Jevrejin, o Jevreja but poštujindže lje. Ov hine phravde vasteso manuš hem but pomožindža e čorore manušendže hem okoljendže kase valjandža bilo savi pomoć. O Kornelije verujindža ko Jehova hem redovno molindža pe ljese. Jekh dive, o anđeo pojavindža pe e Kornelijese hem phendža ljese: „O Devel šundža te molitve. Akana bičhal e manušen ki diz Jopa, kuri tano o Petar hem vičin lje te avel koro tute.“ O Kornelije odmah bičhaldža trinen manušen ki Jopa, koja hine dur okolo 50 km južno andi Cezareja.

Ko isto vreme, ki Jopa, o Petar hine lje jekh vizija. Ov dikhlja e životinjen kola premalo zakon e Jevrejendže na hine dozvolime te han. O glaso ki vizija phendža ljese te hal odola životinje. Ama, o Petar na manglja. Ov phendža: „Me niked ko mo dživdipe na haljum odola nečista životinje.“ Ama, o glaso paljem phendža ljese: „Ma vačer soj tane odola životinje nečista. O Devel čerdža te oven čista.“ Dži o Petar razmislindža andi vizija oljese hine vačerdo: „Trin manuša tane anglo udar. Dža oljencar.“ O Petar dželo dži o udara hem pučlja e manušen sose alje. On phendže ljese: „Amen bičhaldža o Kornelije,  o rimsko vojno zapovedniko. Ov vičini tut te ave koro ljeste ki Cezareja.“ O Petar vičindža odolje manušen te oven oljese gostija hem te račaren odothe. Tajsato dive, ov hem disave phralja andi Jopa dželje oljencar ki Cezareja.

Ked o Kornelije dikhlja e Petare, ov pelo ko kočija. Ama, o Petar vazdindža lje hem phendža: „Ušti! Me hijum samo jekh obično manuš sar tu. O Devel phendža maje te avav koro tute, iako o Jevreja na družinena pe okoljencar so nane Jevreja. Akana, molinava tut, vačer maje sose bičhaldžan e manušen palo mande.“

O Kornelije phendža e Petarese: „Angljeder štar dive dži molindžum man e Jehovase, alo jekh anđeo hem phendža maje te bičhalav e manušen palo tute. Molinava tut, sikav amen ando Jehova.“ O Petar phendža: „Akana džanava so o Devel na dikhela koj tano ko. Ov prihvatini svakone ko mangela te služini ljese.“ O Petar sikavdža ljen but buča ando Isus. Palo odova, o sveti duh hine dindo e Kornelijese hem okoljendže kola hine odothe oljeja hem sare krstindže pe.