Андо форо Кесария жувэлас барэдэр машкар римски воиноря. Лэс ақарэнас Корнилиё. Хоть во и на сас евреё, и евреёря стонас патив пэр лэстэ. О Корнилиё дэлас анда оди и поможыяс лэ чорорэнди. Во патялас андо Иегова и вся время лэсти мангэласпэ. Еқвар каринг лэстэ авеля о анӷело и ԥэндя: «О Дэл ашундя тирэ молитвы. Бишал пэстирэ манушэн андо форо Иоппия, кай терделя о Пётро и манг лэс, кай во тэ авэл каринг тутэ». О Корнилиё йто бишалдя тринэ манушэн андэ Иоппия, сави сас варикай 50 километроря каринг о юго лэ форостар Кесария.

Андэ кадэя время андэ Иоппия о Пётро диқля видения. Во диқля лэ животнонэн, савэ лэ евреёнэнди нащи сас тэ хан. Во ашундя ӷолосо, саво приԥэндя лэсти тэ хал кадэлэ животнонэн. Но о Пётро отԥэндёлас и ԥэндя: «Мэ ни еқвар андэ мэрни жизня на халэм лэ животнонэн, савэ найвужэ андэ лэ Дэвлэстирэ яқа». Тоди о ӷолосо лэсти ԥэндя: «На ԥэн пэ кадэла животни, кай вонэ найвужэ. О Дэл стердя, кай вонэ тэ авэн вужэ». О Пётро кадяжэ ашундя: «Паша тирэ вудара тердён трин мануша. Жа лэнца». О Пётро поджыля каринг и вудара и пушля кай кодэла мануша, состэ вонэ авелэ. Вонэ ԥэндэ: «Амэн бишалдя о Корнилиё, саво барэдэр машкар римски воиноря. Ту трэбуй тэ жас  каринг лэстэ цэрэ андэ Кесария». О Пётро ԥэндя лэ манушэнди, кай вонэ тэ ашэнпэ тэ рятярэн. Ай пэ авэр дес вонэ и дэсавэ ԥрала, савэ анда Иоппия, жылэ андэ Кесария.

Кала о Корнилиё додиқля лэ Петрос, во пэля англа лэстэ пэ чанга. Но о Пётро ԥэндя: «Ущи! Мэ кацаво же мануш, сар и ту. О Дэл приԥэндя манди, кай мэ тэ авав каринг тутэ цэрэ, хоть и евреёря и на ԥирэн кай и найевреёря. Ай акана мангав тут, ԥэн, состэ ту ман ақардян?»

О Корнилиё ԥэндя: «Штар дес палпалэ мэ мангаваспэ лэ Дэвлэсти и о анӷело приԥэндя, кай тэ ақарав тут. Мангав тут, сытяр амэн май драго тэ полас лэ Иеговастирэ алава». О Пётро ԥэндя: «Акана мэ диқав, кай о Дэл обжалпэ лэ манушэса кадя, сар во затердя. Во прилэл кажнонэс, ко лэсти камэл тэ служий». И о Пётро ля тэ росԥэнэн важ о Иисусо всаворэнди, ко сас андо цэр кай о Корнилиё. После када по Корнилиё и пэ кодэла, ко сас лэстэ андо цэр, сжыля о свынто духо. Всаворэ вонэ болделэ.