Qiisaariyaho Roomu olanto roorricha ikkinohu Qornelewoosi yinanni manchi no. Isi Yihudicha ikka hoogirono, Yihudu manni ayirrisannosi. Isi shaqqado ikkino daafira buxane kaaˈlannoho. Qornelewoosi Yihowa ammaninoho, hattono duuchanka woyite huuccatto assiˈranno. Mitto barra sokkaasinchu Qornelewoosiwa mare togo yii: ‘Maganu huuccattokki macciishshino. Xa Pheexiroosi heeˈrannowa Iyophe yinanni katama manna sokke iso woshshiishiˈri.’ Qornelewoosi hakkawoyintenni, sase manna 50 km meddi yaannowa Iyophe yinanni katama soyi.

Hakko mereero, Iyophe katamira Pheexiroosi ajuuja lai. Isi ajuujatenni Yihudootu ittara fajjinoonnikki saada lai; qoleno ‘Iti’ yitanno huuro macciishshi. Isi kayinni, ‘Ani batte ikkinore ite diegennoommo’ yii. Hakkiinni huuro, ‘Maganu qullaawa assinotena, tenne saada battaabbinote yitooti’ yitusi. Qoleno qullaawu ayyaani, ‘Xullote sasu manni agare noohe. Insa ledo haˈri’ yiisi. Pheexiroosi xullo mare, dayino manna ‘Kawira dagginoonnihu mayiraati?’ yee xaˈmi. Insano togo yite qoltu: ‘Ninke Roomu olanto roorrichi Qornelewoosi soyennanke dangoommo. Isi ate minisira Qiisaariya amo yiinohe.’ Pheexiroosi sasenka manna minesi gashshi.  Layinki barra Pheexiroosi ledonsa Qiisaariya haˈri; Iyophete heedhanno roduuwi giddo mitu ledosi hadhino.

Qornelewoosi Pheexiroosi laiti, lekkasira uwe kumbuuli. Pheexiroosi kayinni togo yii: ‘Gotti yii! Anino ate gedee manchooti. Yihudu manni Israeele ikkinokki manni minira eannokkiha ikkirono, Maganu ate minira haˈri yiinoe. Xa mayira woshshoottoero kulie.’

Qornelewoosi Pheexiroosira togo yii: ‘Shoolu barri albaanni, huuccatto assiˈranni heeˈreenna sokkaasinchu daye atewa manna soyi yiie. Konni daafira Yihowa qaale rosiisinke.’ Pheexiroosi togo yii: ‘Maganu mallaadannokkita afoommo. Iso magansiˈra hasiˈranno manna baala baxanno.’ Pheexiroosi Yesuusi daafira duuchare rosiisinonsa. Hakkiinni Qornelewoosiranna ledosi noo mannira qullaawu ayyaani dirreennansa baalunku cuuantino.