Sa iai i Kaisareia se taʻitaʻiʻau Roma maualuga e igoa iā Konelio. E ui lava e lē o ia o se Iutaia, ae sa faaaloalo tagata Iutaia iā te ia. Na ia fesoasoani i tagata matitiva ma lē tagolima. Na talitonu Konelio iā Ieova ma tatalo e lē aunoa iā te Ia. I se tasi aso na faaali mai ai se agelu iā Konelio ma faapea mai: ʻUa faafofogaina e le Atua au tatalo. Ia e aauina atu ni tagata i le aai o Iopa lea o loo nofo ai Peteru, ma talosaga i ai ina ia sau iā te oe.’ O le taimi lava lea na aauina atu ai e Konelio ni tamāloloa se toʻatolu i Iopa, lea e pe ā ma le 30 maila le mamao i saute.

Peitaʻi o le taimi lea na vaaia ai e Peteru se vaaiga i Iopa. Na ia vaaia ni manu sa faasā ona aai ai tagata Iutaia, ma na ia faalogoina se leo o loo faapea mai iā te ia ina ia ʻai. Na musu Peteru ma faapea atu: ʻOu te leʻi ʻai lava i se manu ua lē mamā i loʻu olaga atoa.’ Ae na faapea mai le leo: ʻAua e te taʻua nei manu e lē mamā. Ua faamamāina e le Atua.’ Na faatonuina foʻi Peteru: ʻO loo tutū i lou faitotoʻa ni tamāloloa se toʻatolu. Ia outou ō ma i latou.’ Na alu Peteru i le faitotoʻa ma fesili i tamāloloa pe aiseā ua latou ō mai ai. Na latou tali mai: ʻNa auina mai i matou e Konelio, o se taʻitaʻiʻau Roma. E tatau ona e alu atu i lona fale i Kaisareia.’ Na valaaulia e Peteru nei tamāloloa e nonofo i lona fale ma talimālō iā i  latou. I le aso na sosoo ai, na latou ō faatasi ma nei tamāloloa i Kaisareia, faatasi ma nisi o le ʻauuso mai i Iopa.

Ina ua vaai Konelio iā Peteru, ona ia faapaʻū ai lea i ona vae. Ae na faapea atu Peteru: ʻTū ia i luga, o aʻu foʻi o se tagata e pei o oe. Na faatonuina aʻu e le Atua ou te sau i lou fale, e ui lava e lē asiasi ni tagata Iutaia i fale o tagata o Nuu Ese. O lea, faamolemole taʻu mai pe aiseā ua e aami mai ai aʻu.’

Na faapea atu Konelio iā Peteru: ʻI le fā aso ua mavae na ou tatalo ai i le Atua, ma na faapea mai ai se agelu ina ia aami mai oe. Faamolemole, ia aʻoaʻo i matou i afioga a Ieova.’ Na tali atu Peteru: ʻUa ou iloa e lē faailogatagata le Atua. E na te talia so o se tasi e manaʻo e tapuaʻi atu iā te ia.’ Na aʻoaʻo atu e Peteru iā i latou le tele o mea e uiga iā Iesu. Ona liligi ifo ai lea o le agaga paia i luga o Konelio ma i latou na faatasi ma ia, ma na papatisoina i latou uma.