Su Kaisarea, piạ perwira pasukan Romawi arenge Kornelius. I sie bal᷊inẹ tau Yahudi, katewe tau Yahudi měngẹ̌ngadatẹ̌ si sie. I sie puluang mẹ̌tul᷊ung tau susah. Kornelius mangimang si Yehuwa kụ masau mẹ̌doa si Sie. Piạ su sahěllo, malaekatẹ̌ nakoạ sarang anung i Kornelius kụ nẹ̌bera, ’Mawu seng dimaringihẹ̌ daroanu. Hakị u ene, dolohe ělangu sarang soa Yopa, sarang tampạ pẹ̌tatanakeng i Petrus. Pẹ̌dorong tadeạu i sie duměnta sarang bal᷊enu.’ Kornelius apidu něngoro tělung katau esẹ sarang Yopa, karaune ěndịu 50 kilometer bọu Kaisarea.

Su Yopa, i Petrus nakaěbạ penglihatan. I sie nakasilo manga binatang tawe wotonge kanengangu tau Yahudi. Bọu ene, i sie nakaringihẹ̌ tingihẹ̌ něngoro si sie pakaěng binatang ene. Petrus madiri kụ nẹ̌bera, ’Iạ tawe kụkaěng kaěng haram.’ Tingihẹ̌ ene nẹ̌bera, ’Abe pẹ̌bera ini haram. Mawu seng někoạ ini halal.’ Tingihẹ̌ ene lai naul᷊ị si Petrus, ’Piạ tělung katau esẹ su mukang bal᷊enu. Tol᷊ẹe si sire.’ I Petrus nakoạ sarang mukang bal᷊ene kụ nẹ̌kiwal᷊o su manga esẹ ene kawe nụe i sire diměnta. I sire nẹ̌bera, ’I Kornelius, perwira pasukan Romawi, něndolohẹ̌ si kami sarang ini. I sie nẹ̌dorong tadeạu i Tuang  duměnta sarang bal᷊ene su Kaisarea.’ I Petrus němaringang si sire tělu gunang mẹ̌tikị sene. Sěngkarịěllo mal᷊ukadẹ̌, i sie dingangu pirang katau anạu sěmbaụ bọu Yopa nakoạ sarang Kaisarea dingangu tělung katau esẹ ene.

Su tempong nẹ̌sombang dingangi Petrus, i Kornelius nẹ̌tumpěkuhẹ̌. Katewe i Petrus nẹ̌bera, ’Darisịe! Iạ lai taumata wiasa kere i kau. Mawu něngoro si siạ sarang bal᷊enu maning tau Yahudi biasane tawe wotonge duměnta su wal᷊eng taumata bọu bangsa wal᷊inẹ. Paul᷊ịko si siạ kawe iạ nikui sarang ini.’

Kornelius nẹ̌bera, ’Ěpạ u ěllo tamai, iạ nẹ̌doa su Mawu, kụ piạ malaekatẹ̌ něngoro si siạ pẹ̌kui si kau. Tul᷊ungko těntiroi i kami hengetang i Yehuwa.’ Petrus nẹ̌bera, ’Orasẹ̌ ini iạ seng nakaěna Mawu tawe mawěhạ sěmběka. I Sie mapulu měnarimạ kěbị taumata apang maněmbah si Sie.’ Petrus něněntiro si sire lawọ hal᷊ẹ̌ soal i Yesus. Bọu ene, i Kornelius dingangu taumata su wal᷊ene nakatarimạ rohkẹ̌ masusi, ku i sire kěbị nisahani.