Iha Sezareia, iha xefe ba tropa Roma naran Cornélio. Maski nia laʼós ema Judeu, maibé ema Judeu respeitu nia. Nia ajuda ema neʼebé kiak. Cornélio fiar ba Jeová no mós sempre halo orasaun. Loron ida, anju mosu ba Cornélio no dehan: ‘Maromak rona ona ó-nia orasaun. Agora, haruka ema balu bá Pedro nia hela-fatin iha sidade Jope no husu nia atu mai ó-nia uma.’ Cornélio haruka kedas mane naʼin-tolu ba Jope, neʼebé dook maizumenus kilómetru 50.

Iha tempu neʼebé hanesan, Pedro hetan vizaun ida iha Jope. Nia haree animál sira neʼebé ema Judeu labele han, no nia rona lian ida haruka nia atu han. Pedro lakohi no dehan: ‘Haʼu nunka han animál sira neʼebé la moos.’ Lian neʼe dehan: ‘Keta bolu animál sira-neʼe la moos tanba Maromak halo moos ona.’ Lian neʼe mós dehan: ‘Mane naʼin-tolu iha ó-nia odamatan oin. Bá hamutuk ho sira.’ Pedro loke odamatan no husu mane sira-neʼe tanbasá sira mai. Sira hatán: ‘Xefe ba tropa Roma naran Cornélio mak haruka ami mai. Ita presiza tuir ami bá ninia  uma iha Sezareia.’ Pedro konvida sira tama no toba kalan ida. Loron tuirmai, Pedro no maluk balu husi Jope bá Sezareia hamutuk ho mane sira-neʼe.

Kuandu Cornélio haree Pedro, nia hakneʼak kedas. Maibé Pedro dehan: ‘Hamriik bá! Haʼu mós ema hanesan deʼit ho Ita. Maromak haruka haʼu mai maski ema Judeu labele bá ema husi nasaun seluk nia uma. Favór fó-hatene tanbasá Ita bolu haʼu.’

Cornélio dehan: ‘Loron haat liubá, haʼu halo orasaun no anju ida haruka haʼu atu bolu ó mai. Favór hanorin ami kona-ba Jeová nia liafuan.’ Pedro dehan: ‘Agora, haʼu hatene Maromak la todan ba sorin. Nia simu ema hotu neʼebé hakarak adora nia.’ Pedro hanorin sira buat barak kona-ba Jesus. Tuirmai espíritu santu tun ba Cornélio no ba ninia umakain tomak, no sira hotu hetan batizmu.