La Kayisariya mbaki owandji ɔmɔtshi w’asɔlayi w’ose Rɔmɔ wakawelɛka Kɔnɛliyo. Kaanga mbakinde komonga ose Juda, ase Juda wakɔlɛnyaka. Nde akakimanyiyaka ase wola ndo anto waki lo dihombo la lokaho tshɛ. Kɔnɛliyo aki la mbetawɔ le Jehowa ndo akatetemalaka mbɔlɔmba. Lushi lɔmɔtshi, ondjelo akɛnama le Kɔnɛliyo ndo akawotɛ ate: ‘Nzambi amboka alɔmbɛlɔ ayɛ. Kakianɛ toma anto l’osomba wa Jɔpa, lɛnɛ adjasɛ Petero ndo lɔmbande dia nde ndja le yɛ.’ Aha la ntshimbatshimba, Kɔnɛliyo akatome apami asato otsha la Jɔpa, kilɔmɛtɛlɛ oko 30 lo sidɛ.

Lo etena kakɔ kaamɛ, lam’akinde la Jɔpa, Petero akɛnyi ɛnɛlɔ kɛmɔtshi. Nde akɛnyi nyama yaki ase Juda kokokaka ndɛ, ko nde akoke dui dimɔtshi diawotɛ dia nde ndjilɛ. Petero akatone, ata ate: ‘Ko dimi latalɛka nyama ka mindo lo lɔsɛnɔ lami.’ Oma laasɔ, dui diakɔ diakawotɛ ɔnɛ: ‘Takelɛ nyama nyɛ ɔnɛ nyama ya mindo. Nzambi amboyɛdia.’ Wakatɛ Petero nto ɔnɛ: ‘Apami asato wekɔ lo soko diayɛ. Tshɔka kaamɛ la wɔ.’ Petero akatshu otsha la soko ndo akambola apami akɔ lande na kakiwɔ laawɔ. Vɔ wakakadimola vate: ‘Kɔnɛliyo, owandji w’asɔlayi w’ase Rɔmɔ kototomi. Wɛ pombaka ntshɔ otsha lo luudu lande la Kayisariya.’ Petero akatɛ  apami akɔ dia vɔ ntshikala otsho w’otondo oko angɛndangɛnda ande. La wedi a pindju, nde akatshu kaamɛ la wɔ la Kayisariya, kaamɛ la anangɛso amɔtshi w’oma la Jɔpa.

Kam’akɛnyi Kɔnɛliyo Petero, nde akakusɛ adwe. Koko Petero akawotɛ ate: ‘Emala! Dimi lekɔ onto oko wɛ. Nzambi akambutɛ dia dimi ndja lo luudu layɛ, kaanga mbele ase Juda hawɔtɔ lo mvudu y’ase Wedja. Kakianɛ, lam’amalangayɛ ombute lande na kakayatome dia vɔ tombelɛ.’

Kɔnɛliyo akatɛ Petero ate: ‘Ambeta nshi nyɛi, dimi lakalɔmbaka Nzambi, ko ondjelo ɔmɔtshi akambutɛ dia dimi ntoma anto dia tokelɛ. Lam’alangayɛ, otetsha ɔtɛkɛta wa Jehowa.’ Petero akate ate: ‘Lambɛna dia Nzambi keema la shɔnɔdi. Nde mbetawɔka onto tshɛ lalanga mbɔtɛmɔla.’ Petero akawaetsha akambo efula wendana la Yeso. Ko nyuma k’ekila kakaye le Kɔnɛliyo la wanɛ waki kaamɛ la nde, ko vɔ tshɛ wakabatizama.