KuKkayisareya, kwakali kukkala mupati wabasilumamba wamaRoma uutegwa Kkorneliyo. MaJuda bakali kumulemeka nikuba kuti taakali muJuda pe. Wakali kugwasya bantu bafwaba. Kkorneliyo wakali kusyoma Jehova alubo wakali kukomba kuli nguwe chiindi chiingi. Bumwi buzuba, Kkorneliyo wakabona mungelo mpawo mungelo wakati: ‘Leza wazimvwa nkombyo zyako. Tuma baalumi kuJopa kukkala Petro, bakamubuzye kuti aze kumuunzi wako.’ Mpawo Kkorneliyo wakatuma baalumi batatu kuti baye kuJopa nkwili kumusanza, wakali musinzo wamakkilomita aali 50.

Muchiindi eecho, Petro wakabona chilengano kali kuJopa. Wakabona banyama bakatali kuligwa amaJuda mpawo wakamvwa jwi kalimubuzya kuti alye. Petro wakakaka akwaamba kuti: ‘Kuzwa nindakazyalwa, tandinalya nyama yabanyama bakasigwa amulawu waLeza.’ Pesi jwi lyakati: ‘Utaambi kuti banyama aaba tabeelede kuligwa. Nkaambo Leza wabasalazya.’ Alubo, Petro wakabuzigwa kuti: ‘Kuli baalumi batatu kumulyango wang’anda yako. Wiinkaabo.’ Petro wakajula mulyango mpawo wakababuzya kuti bayandaanzi. Bakati: ‘Twatumwa aKkorneliyo mupati wabasilumamba wamaRoma. Weelede kuya kumuunzi wakwe kuKkayisareya.’ Petro wakabanjizya mung’anda kuti  balale. Nibwakacha, wakayinkaabo kuKkayisareya alimwi wakasindikilwa abazyalwanyina bakuJopa.

Kkorneliyo naakabona Petro wakamufugamina. Pesi Petro wakati: ‘Buka! Andime ndili mbuli nduwe. Leza wandituma kuti ndize kumuunzi wako nikuba kuti maJuda tabazumizigwi kuti kabasika kumyuunzi yabantu batali maJuda. Ndikumbila undibuzye kuti nkamboonzi nwati ndize kumuunzi wako?’

Kkorneliyo wakabuzya Petro kuti: ‘Mazuba one akiinda ndakali kukomba kuli Leza mpawo mungelo wakandibuzya kuti nditume bantu bakakwiite. Ndikumbila utuyiisye majwi aaJehova.’ Petro wakati: ‘Ndaziba kuti Leza tasalululi pe. Ulatambula kufumbwa muntu uuyanda kumukomba.’ Petro wakababuzya zintu zyiingi zilaatala aJesu. Mpawo, Kkorneliyo abantu bonse mbakali aabo bakazula muuya uusalala alimwi bakabbabbatizigwa.