Ja bʼa Cesarea ajyi jun winik jel tʼilan bʼa kʼot olomal bʼa kʼakʼanum bʼa Roma sbʼiʼil Cornelio. Ama mi judíoʼuk, pe wani xkisji yuja judíoʼik. Jel lek skʼujol, yujni wa skoltay ja pobreʼik soka matik ay snesesida. Ja Cornelio wa skʼuʼan bʼa Jyoba sok tolabida wa xyayi orasyon. Jun kʼakʼu, sjeʼa sbʼaj jun anjel sok aljiyabʼ: «Ja Dyosi yabʼta jawa worasyoniki. Jeka jawa winik man bʼa chonabʼ Jope, ja bʼay ja Pedro, bʼa a-skʼaneyi ajak yila». Ja Cornelio wegoxta sjeka oxe swinik man Jope, wa xkan junuk 50 kilometro ja bʼa sur.

Jaxa bʼa Jope, ja Pedro yila jun nakʼsat. Yila chanteʼik bʼa mi xkʼanji oj skʼux-e ja judíoʼiki. Ti yabʼ jun kʼumal bʼa wan yaljel a-skʼuxe. Ja Pedro mi skʼana sok yala: «Mi bʼa jkʼuxunejuk chanteʼik bʼa kux». Ti jakʼjiyi: «Moka wal ta kuxto ja chanteʼik it, ja Dyosi wa xyala mixa kuxuk». Cha aljiyabʼ: «Ay oxe winik ja bʼa wa pwerta, kaʼax soke». Ja Pedro waj ja bʼa pwerta sok sjobʼoyi ja winike jas yuj teye tiw. Ja yeʼnle sjakʼawe: «Yeʼn sjekunejotikon ja Cornelio, jun olomal bʼa kʼakʼanum bʼa Roma. Wa sjeka payjel man snaj bʼa Cesarea». Ja Pedro sloko bʼa ti oj kanuke tiw  ja akwal jaw. Yajni el ja kʼakʼu, wajye man Cesarea. Cha wajye jujuntik smoj-aljelik bʼa Jope.

Yajni ja Cornelio yila kʼot ja Pedro, koʼ mekʼan. Pe ja Pedro yala: «Kʼeʼan. Kechan jun winikon jastal weʼna. Ja Dyos yalakabʼ bʼa oj jakon bʼa wa naj, ama ja judíoʼik mini la ochtikon ja bʼa snaje ja matik mi judíoʼuki. Ja wego, awa pabor, alakabʼ jas yuj ajeka jpayjel».

Ja Cornelio xcholo yabʼ ja Pedro: «Ayxa chane kʼakʼu wanon yajelyi orasyon ja Dyosi, sok yalakabʼ jun anjel bʼa oj jeka payjel. Awa pabor, jeʼakitikon ja jastik wa xyala ja Jyoba». Ja Pedro sjakʼa: «Ja wego wa xkabʼ stojolil ja Dyosi mi tsaʼubʼalta wa xyila ja ixuk winiki, lekni wa xyila yibʼanal ja matik wa skʼana oj yaʼteltaye». Ja Pedro sjeʼayi jitsan jastik sbʼaja Jesús. Anto, ja Cornelio soka matik teyesoki koʼ sbʼaje ja yip ja Dyosi sok yiʼaje jaʼ.