Кесария деп хоорайга рим аг-шеригниң хүндүткелдиг даргазы Корнилий дээр кижи чурттап чораан. Ол еврей эвес-даа болза, ону еврейлер хүндүлээр турган. Ол харам эвес болгаш, ядыы улуска дузалап чораан. Корнилий Иеговага бүзүреп, мөргүүр турган. Бир катап ангел аңаа көстүп келгеш, мынча дээн: «Бурган мөргүлдериңни дыңнап каан. Иоппия хоорайда Пётрже улузуңну чоргузупкаш, ону чедип кээр кылдыр диле». Корнилий дораан-на Кесарияның мурнуу талазында 50 километр ыракта Иоппияже үш кижизин чоргузупкан.

Ол үеде Иоппияга Пётр еврейлерниң чип болбазы дириг амытаннарны көстүүшкүнге көрген. Оон бир үн оларны чиирин дужааган. Пётр: «Мен чуртталгамда чаңгыс-даа арыг эвес дириг амытан чип көрбээн мен» — дээн. Ынчан ол үн мынча дээн: «Бо дириг амытаннарны арыг эвес диве. Оларны Бурган арыглап каан». Оон ол үн: «Эжииң чанында үш кижи чедип келди, оларның-биле кады чорувут» — дээн. Пётр оларның чүге келгенин айтырган. Олар аңаа: «Бисти рим аг-шеригниң даргазы Корнилий чоргузупту. Сен бистиң-биле Кесарияже баар ужурлуг сен» — деп харыылаан. Пётр  ол улусту хонуп алырын дилээш, дараазында хүн кезек акылар-биле Кесарияже чорупканнар.

Корнилий Пётрну көрүп кааш, ооң мурнунга дис кырынга кээп дүшкен. Ынчалза-даа Пётр: «Туруп келиңер! Мен силер ышкаш кижи-дир мен. Еврейлер өске чоннар улузунче аалдавас-даа болза, Бурган мени силерже чоргузупту. Чүге мени кыйгырдыңар?» — дээн.

Корнилий аңаа: «Дөрт хонук бурунгаар Бурганга мөргүдүм. Оон ангел сени кыйгырып алырын чугаалады. Биске Иегованың сөстерин эки билип алырынга дузалап көрем» — деп харыылаан. Пётр мынча дээн: «Ам-на көрүп тур мен, Бурган чөптүг-дүр. Ол аңаа бараалгаксаар кижи бүрүзүн хүлээп алыр-дыр». Пётр Корнилийниң бажыңында улуска Иисустуң дугайында чугаалап бээрге, олар ыдыктыг сүлде бүргеткеш, сугга суктуруп алган.